Reitor UNDIL Jose Agostinho Belo hafoin asina akordu ho Diretor Deputi JSMP, Casmiro dos Santos hodi fo Formasaun Justisa ba estudantes UNDIL. Imajen/Osoria Marques

DILI, 24 fevereiru 2020 (TATOLI)–Judisial System Monitoring Program (JSMP-inglés) no Universidade DILI (UNDIL), ohin, asina akordu hodi halo kooperasaun iha área formasaun, advokásia, diplomasia ne’ebé presiza hamutuk iha justisa.

Tuir Diretór Deputi JSMP, Casmiro dos Santos hateten, objetivu husi asina akordu ne’e atu fahe informasaun ba malu entre instituisaun rua ne’e kona-ba formasaun liuliu iha área direitu nian.

“Tuir ha’u-nia prespetiva katak liuhusi akordu ne’e bele ajuda estudante sira ne’ebé estuda kona-ba direitu nian. Ita prepara rekursu fasilidade hodi ajuda estudante sira husi universidade,”  dehan Casmiro dos Santos ba Ajénsia TATOLI iha salaun JSMP, Colmera, Dili, ohin.

Nia hatutan, formasaun ne’e fasilita estudante sira bele asesu ba rekursu ne’ebé mak JSMP iha. Estudante sira, nia dehan, atu hatene mós informasaun ne’ebé mak JSMP prodús ona ne’ebé mak liga liu ba funsionamentu sistema judisiáriu nian, prosesu kazu nomós fó kapasitasaun ba estudante sira-nia koñesementu iha área Lei nian.

Entretantu, nia dehan, akordu ho UNDIL ne’e estudante sira bele asesu informasaun ne’ebé durante ne’e JSMP prodús no estudante sira mós bele partisipa treinamentu ne’ebé JSMP fornese nomós peskiza hamutuk ho JSMP kona-ba lei sira.

Iha fatin hanesan, Reitór UNDIL, José Agostinho da Costa Belo hateten, liuhusi asina akordu ho JSMP bele ajuda no fasilita estudante sira kona-ba prosesu justisa iha Timor.

“Ita bele ajuda ema ne’ebé kbiit laek ba justisa tanba direitu no justisa mós halo parte ba akadémika nia responsabilidade,” nia hateten.

Nia dehan, aleinde estudante sira aprende iha universidade nomós bele aprende iha JSMP.

“Tanba, ha’u hanoin JSMP hanesan laboratoriu ida ba ami-nia estudante sira no oinsá peskiza hamutuk hodi kontrola nafatin justisa iha ita-nia rain tanba ema barak mak sei kestiona kona-ba justisa,” nia esplika.

Nia informa, antes ne’e JSMP halo kooperasaun ho instituisaun sira iha rai-liur mak hanesan Universidade Melbourne (Melbourne University) Austrália, Universidade Nigéria Arizona (Arizona State university) Amerika nian.

“Durante ne’e, ami sempre involve estudante sira maibé la regularmente tanba laiha akordu formál ida entre ami,” nia esplika.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here