Xefe Departementu Abastesimentu, Servisu Agua no Saneamentu (SAS), Francisco Xavier Pereira. Imajen/Osória A.Marques

DILI, 24 fevereiru 2020 (TATOLI)–Xefe Departamentu Abastesimentu Água Munisípiu Dili, Francisco Pereira Xavier informa, Komunidade maioria mak seidauk iha konsiénsia hodi kuidadu bee ne’ebé Diresaun Nasionál Servisu Água (DNSA) fornese tanba komunidade balun utiliza bee hodi rega modo.

“Tanba, ita hotu hatene katak ita-nia komunidade balu iha parte Manleuana nian ne’e utiliza bee DNSA nian ba agrikultura hanesan halo kantarreiru modo nian iha ne’ebá. Sira uza bee ne’e hodi rega fali ba modo,” dehan Xefe Departamentu Abastesimentu Água Munisípiu Dili, Francisco Pereira Xavier, ba Ajénsia TATOLI iha nia knar fatin, Caicoli, Dili, ohin.

Nia haktuir, bee ne’ebé DNSA fornese ba komunidade ne’e envéz hodi konsumu no uza ba nesesidade bázika maibé se sira uza estraga bee entaun la sufisiente ba konsumidór seluk.

“Bainhira sira uza bee ne’ebé mak DNSA fornese ne’e ba rega modo enatun bee la to’o ona ka la sufisiente ba konsumidór seluk,” nia hateten.

Nia infroma, bee moos ne’e halo ona iha estasaun tratamentu aimoruk nian mak foin halo distribuisaun ba komunidade sira.

“Bee moos ne’e ami halo ona tratamentu iha estasaun tratamentu aimoruk nian tanba presiza ita hotu nia konsiénsia bainhira uza bee,” nia dehan.

Tanba ne’e, nia husu ba komunidade sira ne’ebé mak halo kantarreiru ba modo nian atu labele uza bee-moos ne’ebé DNSA fornese tanba bee-moos ne’e iha tau atu komsumu la’ós hodi rega fali ba modo.

“La’ós labele uza bee ba rega modo maibé uza bee ne’ebé uzadu ona signifika bee haris nian,” nia esplika.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here