Eis-Prezidente Repúblika no atuál Prezidente Partidu CNRT, Kay Rala Xanana Gusmão. Imajen Tatoli/ Egas Cristóvão

DILI, 22 fevereiru 2020 (TATOLI)–Eis-Prezidente Repúblika, Kay Rala Xanana Gusmão apresia tebes ho Lautém-oan sira ne’ebé iha inisiativa halibur hamutuk hodi define dezenvolvimentu iha munisípiu.

“Ha’u apresia ho Lautém-oan sira nia inisiativa halibur hamutuk hodi fahe informasaun ba malu. Forúm komunikasaun sosiál tenke fahe ba ema hotu”, Kay Rala Xanana Gusmão dehan hafoin partisipa Primeira Asembleia Jerál Fórum Komunikasaun Sosiál Ponta Leste (FKPL) ho tema “Hamutuk Lautém forsa, forsa Lautém-oan bele” iha Universidade Orientál Timor Lorosa’e (UNITAL), Becora, Dili, ohin.

Iha forúm komunikasaun sosiál ne’e, Xanana husu ba juventude Munisípiu Lautém atu loke kakutak no hanoin hodi dezenvolve rai Lautém.

“Ha’u husu ba imi juventude Lautém tenke define imi-nia potensialidade hodi dezenvolve no labele hein Governu sentrál”, Xanana enkoraja.

Aleinde ida-ne’e, Xefe Komisaun Organizadora FKPL, Florindo Pereira hateten objetivu hodi realiza fórum komunikasaun sosiál ida-ne’e atu ko’alia kona-ba dezenvolvimentu Munisípiu Lautém.

“Ami-nia esperansa husi forúm ne’e atu oinsá ami Lautém-oan sira dezenvolve ami-nia dezenvolvimentu iha Munisípiu Lautém”, nia tenik.

Nia esplika, fórum ne’e realiza tanba apoia inisiativa husi Lautém-oan rasik.

Partisipa iha Fórum Komunikasaun Sosiál Ponta Leste maka hanesan Eis-Prezidente Repúblika, Kay Rala Xanana Gusmão, Eis-Ministru Agrikultura no Peska (MAP), Mariano Sabino “Assanami”, Eis-Ministru Defeza no Seguransa, José Agostinho Sequeira “Somotxo” no mós Administradór Munisípiu Lautém no universitáriu sira.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here