Eis Prezidente Repúblika, José Ramos Horta. Imajen/Egas Cristovão

DILI, 22 fevereiru 2020 (TATOLI)–Eis Prezidente Repúblika, José Manuel Ramos Horta hateten nia ko’alia ona ho Prezidente Partidu Congresso Nacional de Reconstrução de Timor (CNRT), Kay Rala Xanana Gusmão mak tenke sai Primeiru-Ministru (PM) ba IX Governu Konstitusionál.

“Iha diálogu durante ne’e ha’u ko’alia ona ba Xanana atu nia mak tenke kaer duni Governu ida-ne’e. Ema seluk labele. Ha’u prefere nia tanba tinan 20 ona iha esperiénsia ne’ebé di’ak iha Prezidente Repúblika, Primeiru-Ministru, nia hatene di’ak ekonomia rai-laran nian,” Horta ba jornalista iha sede CNRT, Bairros dos Grilhos, Dili, ohin.

Nia dehan, laiha dúvida ba Xanana tanba ho nia lideransa bele rezolve fronteira marítima no halo negosiasaun ho Indonézia kona-ba fronteira terrestre.

“Xanana ema ida-ne’ebé matenek. Ha’u haree situasaun sira difísil nia bele ultrapasa. Ita haree negosiasaun ho Indonézia la’ós fásil maibé nia bele halo,” nia louva.

Jornalista: Hortençio Sanchez

Editór: Agapito dos Santos

HAKEREK NO HATÁN

Please enter your comment!
Please enter your name here