Konferénsia imprensa Partidu CNRT, PD, KHUNTO, PUDD no UDT/FM, kona-ba akta koligasaun foun atu harii IX Governu Konstitusionál. Imajen Tatoli/ dok.

DILI, 22 fevereiru 2020 (TATOLI)—Partidu lima hamutuk ho CNRT kompromete hakotu impase polítika liuhosi konjuntura polítika foun.

Komunikadu imprensa ne’ebé Agência TATOLI asesu hosi partidu forma koligasaun, ohin, haktuir Partidu CNRT, KHUNTO, Partido Democratico (PD), PUDD, UDT, Frenti-Mudança, katak situasaun impase politika rai-laran oras ne’e afeta tebes populasaun nia moris loron-loron nian no mós paraliza daudaun ona atividade esensiál Estadu no privadu nian.

Komunikadu ne’e hateten, bainhira husik kle’ur situasaun impase ne’e la’o bele provoka estragu boot-liu iha setór ekonómiku país-nian, hodi halo populasaun sai vulnerável liu, iha nia rendimentu ne’ebé uitoan.

Komunikadu akresenta mós katak Prezidente Repúblika, Francisco Guterres Lú Olo iha 10 fevereiru 2020 hafoin reuniaun ho líder sira país nian ne’ebé hateten katak Eleisaun Antesipada hanesan rekursu ikusliu nune’e apela ba iha partidu polítiku sira ne’ebé iha asentu Parlamentár atu estuda forma solusaun ne’ebé di’ak liubá situasaun impase polítika ne’e.

“Ho nune’e maka Partidu Congresso Nacional de Reconstrução de Timor-Leste (CNRT), Partidu Kmanek Haburas Unidade Nasional Timor Oan (KHUNTO), PD, Partidu Unidade Dezenvolvimentu Demokrátiku (PUDD), Partidu União Democrática Timorense (UDT) no Partidu Frenti-Mudança (FM) deside halibur hamutuk hodi forma koligasaun ida hodi fó solusaun ba iha situasaun atuál liuhosi formasaun IX Governu Konstitusionál hodi aprezenta Orsamenetu Jerál Estadu atu finansia atividade esensiál Estadu no povu-nian nune’e estimula filafali ekonomia nasaun hodi fó benefísiu ba povu no Estadu ida-ne’e”, refere komunikadu imprensa ne’ebé fó sai, ohin.

Partidu sira ne’ebé forma koligasaun ne’e kompromete katak iha mandatu governasaun ne’e sei hala’o tuir programa estratéjiku dezenvolvimentu nasionál hanesan mensiona tuir mai:

1. Kontinua implementa programa ne’ebé uluk VIII Governu hala’o ne’ebé bazeia ba iha Planu Estratéjiku Dezenvolvimentu (PED) 2030.

2. Tau-matan ba povu sira iha área rurál hodi hadi’a sira-nia moris.

3. Garante estabilidade nasionál ne’ebé hanesan fatór determinante ida ba dezenvolvimentu nasionál.

4. Kontinua hala’o negosiasaun fronteira terrestre no marítima ho Indonézia atu hetan solusaun ne’ebé justa ba iha delineasaun fronteira entre Timor-Leste ho Indonézia.

5. Kontinua tau-matan ba iha veteranu, idozu, defisiente no oan-ki’ak sira.

6. Kontinua hadi’a infraestrutura.

7. Hamutuk ho órgaun justisa sira kontinua reforma justisa hodi serbí di’akliu povu.

8. Promove nafatin boa governasaun.

Deklarasaun konjunta ne’e halo hanesan baze hodi hamosu Paktu Koligasaun ne’ebé sei sai matadalan ba Governasaun IX.

Jornalista: Evaristo Soares Martins

Editór: Cancio Ximenes

1 KOMENTÁRIU

  1. Se CNRT mk nafatin representa nain 8 ida PR la fo posse ne hau hanoin susar sei mosu tan mai. Espera sira bele buka substituição hodi aguenta lai governasaun ida ne to remata.

HAKEREK NO HATÁN

Please enter your comment!
Please enter your name here