Diálogu entre komunidade no deputadu sira iha Liquiçá. Imajen Tatoli/Cipriano Colo

DILI, 22 fevereiru 2020 (TATOLI)–Komunidade iha Postu Administrativu Maubara, Munisípiu Liquiçá, preokupa ho alfaiate sira ne’ebé ikus-ikus ne’e suku Bandeira Nasionál Repúblika Demokrátika Timor Leste (RDTL) la tuir koor orijinál.

Preokupasaun ne’e hato’o husi abitante Alcino Freitas da Cruz, durante diálogu entre deputadu sira husi partidu asentu Parlamentár ho komunidade Postu Administrativu Maubara ho tema ‘Rona Povu Nia Lian’ ne’ebé organiza husi Organizasaun Institutu Republikana Internasionál (IRI), ne’ebé hala’o iha salaun Parokiál Maubara, ohin.

Nia dehan, iha Konstituisaun Repúblika Demokrátika Timor-Leste artigu 15 alínea 2 define koor bandeira nasionál kompostu husi koor kinur, metan, mean no mutin, ho fitun, maibé realidade hatudu katak ikus-ikus ne’e bandeira ne’ebé dada iha edifísiu públiku sira mosu tan koor mutin vertikál iha ninin bandeira nian, ne’ebé haketak dook husi fitun.

“Ho ida-ne’e, ha’u konsidera la tuir ona saida mak define iha konstituisaun no bele mós mosu interpretasaun oin seluk”, Alcino konsidera.

Tanba ne’e, Alcino rekomenda ba deputadu sira atu halo fiskalizasaun direta ba iha terrenu hodi haree rasik ho matan, kona-ba realidade ida-ne’e, tanba bandeira hanesan símbolu nasionál nasaun RDTL no ema barak mak mate tanba símbolu ida-ne’e.

Kona-ba preokupasaun ne’e, deputada Elvina Sousa husi Partidu Demokrátiku husu ema hotu atu hato’o keixa ba autoridade lokál bainhira haree ema ruma fa’an bandeira nasionál la tuir koor loloos ne’ebé hatuur iha Konstituisaun RDTL.

“Ha’u hakarak atu hato’o ba estudante sira, autoridade lokál no sidadaun hotu atubele halo keixa ba polísia, bainhira haree ema balun dada bandeira RDTL la tuir koor ne’ebé aprovadu tuir Konstituisaun RDTL”, nia husu.

Preokupasaun ne’e mós sai hanesan matéria diskusaun ida iha Parlamentu Nasionál oinsá fó atensuan ba autoridade lokál sira, hodi maksimiza liután vizilánsia ba asuntu ne’e.

Deputadu ne’ebé marka prezensa iha diálogu ne’e mak hanesan deputadu Félix da Costa ho deputada Lídia Norberta husi Bankada FRETILIN, deputada Elvina Sousa husi Bankada Partidu Demokrátiku, no deputadu Leandro Lobato husi Bankada CNRT.

Diálogu ne’ebé hala’o durante loron ida-ne’e, ho partisipante mai husi autoridade lokál husi suku hitu, komunidade, profesór sira, estudante sira, autoridade seguransa, reprezentante partidu polítiku husi Postu Administrativu Maubara no Igreja.

Programa ida-nee implementa husi Institutu Repúblikana Internasionál (IRI), hetan apoiu finanseiru husi povu Amarikanu liuhusi USAID.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here