Embaixadór naun Rezidénte husi Olanda Lambertus Cristiaan Grijns, entrega karta kredensiál ba Prezidente Repúblika Francisco Guterres Lu Olo, iha Salaun Xina Palásiu Prezidensiál Bairrupité, Dili.Imajen/Media PR

DILI, 21 fevereiru 2020 (TATOLI)-Xefe Estadu, Francisco Guterres Lú Olo, ohin, ho laran ksolok simu karta kredensiál husi Embaixadór akreditadu husi Suésia, Xile no Olanda ne’ebé ofisialmente tau matan ba Timor-Leste husi Jakarta.

Diretór Jerál Ba Asuntu Bilaterál, Domingos Savio informa,  embaixadór na’in tolu ne’ebé entrega karta kredensiál ba Prezidente Repúblika mak Marina Berg husi Suésia, Gustavyares Ossandon husi Xile no Lambertus Cristiaan Grijns husi Olanda ho objetivu atu hametin relasaun bilateral no multilateral.

“Nasaun tolu ohin ne’e kuaze nasaun hotu-hotu, sira-nia objetivu ikus ne’e atu halo relasaun ne’ebé metin ho Timor-Leste ho Sira nia rain. Sira suporta ita, ita mós suporta sira. Ita nia suporta ne’e dala barak iha multilaterál iha Nasaun Unida no iha organizasaun internasionál sira. Sira kontente tanba bele entrega sira-nia karta kredensiál no Prezidente Repúblika mós kontente,” dehan Domingos Savio ba jornalista sira iha Palásiu Prezidensiál, Bairru-Pité, Dili, ohin.

Nia hatutan, Embaixadór Lambertus Cristiaan Grijn agradese ba apoiu hosi Timor-Leste iha asuntu multilateral iha ONU no organizasaun internasional sira seluk. Embaixadór ne’e haktuir, bainhira nia sei estudante, nia hamutuk ho grupu solidariedade apoiu Timor-Leste nia ukun rasik aan.

Nia haktuir, iha 2015, kompañia Olandeza Heineken asina Memorandu de Entendimentu ho Governu Timor-Leste atu hala’o produsaun serveja iha Timor-Leste.

Tuir nia, Olanda apoiu Timor-Leste liuhusi Uniaun Europeia, ONU, Cruz Vermelha no ONG sira iha área dezenvolvimentu rurál, saúde no kapasitasaun institusionál.

Iha 2012 Olanda partisipa iha Eleisaun Parlamentaár lihusi Misaun Observasaun Eletorál Uniaun Europeia no iha 2012 Olanda kontribui ba misaun ONU iha Timor-Leste iha área governasaun demokrátika no estimula diálogu entre Governu no parte doméstika sira.

Alende ne’e, Domingos Savio hatutan, Timor-Leste no Suésia estatebelese relasaun diplomátika iha 2002 no ho Xile iha 2008 maibé Timor-Leste seidauk iha kooperasaun bilaterál ho Suésia no Xile.

Notísia Relevante: TL-Fransa Fortifika Nafatin Kooperasaun Ba Kapasitasaun Rekursu Umanu

Jornalista: Cipriano Col

INFORMASAUN

HAKEREK NO HATÁN

Please enter your comment!
Please enter your name here