Prezidente Repúblika, Francisco Guterres Lú Olo. Imajen/ Tatoli Egas Cristovão

DILI, 21 fevereiru 2020 (TATOLI)–Prezidente Repúblika (PR), Francisco Guterres Lú Olo, prontu atu fó apoiu ba kualkér koligasaun foun ne’ebé forma husi partidu polítiku sira atu forma Governu foun, hodi hakat liu impase polítika rai-laran.

Xefe Estadu hato’o asuntu ne’e hafoin serimónia resesaun ho diplomata internasionál sira ne’ebé oferese rasik husi Prezidente Repúblika ho espoza, iha Palásiu Nobre, Lahane, Dili, sesta kalan.

“Ha’u hanoin importante maka partidu polítiku sira buka malu ba, depois maka bele fó hatene ba Prezidente Repúblika, kona-ba Governu ida ne’ebé maka sente ba di’ak atu bele lori ita-nia rai ne’e bá-oin. Prontu, Prezidente Repúblika sempre fó apoiu nafatin, atu ita bele ultrapasa krize ida-ne’e, atu bele hadi’a fali ita-nia Governu. Ita hakarak iha governasaun ida-ne’ebé sustentável durante tinan rua ka tolu nia laran, hodi iha fali orsamentu, iha fali programa atubele hala’o dezenvolvimentu”, Lú Olo informa.

Prezidente Repúblika mós hakarak atu fó tempu ba partidu polítiku sira, liuliu líder sira no partidáriu sira atu konsulta ba malu hodi hetan rezultadu ruma.

“Ita fó tempu ba partidu polítiku sira, liuliu ba ita-nia líder sira, líder partidáriu sira atu tuur hamutuk hodi ko’alia ba malu”, Xefe Estadu subliña.

Entretantu, oras ne’e daudaun líder partidu polítiku sira sei iha períudu konsultasaun atu buka entedimentu finál.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here