Prezidente Repúblika, Francisco Guterres Lú Olo, iha serimónia despedida ho Embaixadór Repúblika Itália ba Timor-Leste, Vittorio Sandalli, iha Palásiu Prezidente Nicolau Lobato, Bairru Pité, Dili. Imajen Mídia PR

DILI, 21 fevereiru 2020 (TATOLI)–Prezidente Repúblika (PR), Francisco Guterres Lú Olo apresia tebes no agradese ba lasu amizade entre Itália no Timor-Leste (TL), no husu atu relasaun bilaterál rai no povu rua kontinua iha futuru.

Prezidente Repúblika, Francisco Guterres Lú Olo hato’o agradesimentu ne’e, durante enkontru kortézia ho Embaixadór Repúblika Itália ba Timor-Leste, Vittorio Sandalli, iha Palásiu Prezidente Nicolau Lobato, Bairru Pité, Dili, ohin.

Hafoin enkontru, embaixadór Vittorio hateten Prezidente Repúblika Lú Olo louva apoiu husi Itália liuliu misionáriu Italianu sira ne’ebé fó kontribuisaun maka’as ba luta libertasaun Timor-Leste nian.

Nia esplika, Prezidente Lú Olo partikularmente mensiona Madre Erminia Cazzaniga, misionária Italiana ida-ne’ebé halo papél importante iha luta ba independénsia Timor-Leste nian, ne’ebé asasinadu husi Milísia Pro-Integrasaun ALFA iha 25 setembru 1999, iha Lautém.

Aleinde ne’e, nia hatutan, Prezidente mensiona mós Padre Elígio Locatelli, Misionáriu Italianu ida-ne’ebé servisu maka’as iha prosesu luta ba libertasaun pátria no kontinua fó nia kontribuisaun ba dezenvolvimentu Timor-Leste nian iha pós ukun rasik-an.

Soru-mutuk kortézia PR Lú Olo ho Embaixadór Vittorio marka hanesan enkontru ikus nian antes Embaixadór ne’e termina nia mandatu.

“Previléjiu boot ba ha’u ohin bele hasoru-malu ho Prezidente Repúblika iha ha’u-nia mandatu rohan iha Timor-Leste. Ha’u vizita Timor-Leste dala barak durante ha’u-nia mandatu no ohin okaziaun di’ak atu reitera filafali espíritu no sentimentu amizade entre Itália ho Timor-Leste”, tenik Vittorio.

Reprezentante Governu Itália ne’e mós subliña katak Itália besik tebes ho Timor-Leste iha tempu luta ba independénsia no kontinua fahe inisiativa no valór barak hamutuk iha nível Nasaun Unida nian.

Vittorio refere mós ba estabelesimentu Sentru ba Direitu Umanu iha Fakuldade Siénsia Sosiál, Universidade Nacional Timor Lorosa’e (UNTL), ne’ebé estabelese iha outubru 2019.

Tuir nia, maski projetu ne’e hetan apoiu husi Uniaun Europeia, maibé tanba ‘Global Campus of Human Rights’ nia kuartél jerál iha Venice Lido Itália no uza entidade Lei Itália nian, nune’e bele konsidera ida-ne’e hanesan kooperasaun Itália ho Timor-Leste nian.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here