Eis Primeiru-Ministru no Atual Xefe Negosiadór ba Asuntu Fronteira Marítima no Terestre, Kay Rala Xanana Gusmão, Gusmão. Imajen Tatoli/ Egas Cristovao

DILI, 21 fevereiru 2020 (TATOLI)-Eis Primeiru Ministru, Kayrala Xanana Gusmão husu ba joven Formandu 34 hosi Sentru Formasaun EIROS atu aprende lisaun barak liután hodi nune’e bele hasa’e abilidade no koñesementu pesoál ba apoiu dezenvolvimentu Nasionál.

Xanana hato’o mensajen ne’e iha ninia deskursu durante serimonia graduasaun ba Estudante EIROS 34 hafoin partisipa formasaun iha área administrasaun, Bankaria no komputadór durante tinan ida.

“Labele hanoin katak hatene de’it komputadór mak ne’e ona, ne’e formandu ida la kompletu. Formandu ne’ebé kompletu mak ema ne’ebé iha koñesimentu kle’an buka atu aprende tan buat seluk,”katak Xanana Gusmão iha Salaun Esperansa Aimutin Dili, ohin.

Koñesimentu ema ida nian la’os haree de’it ba diploma no sertifikadu sira maibé prátika maka justifika loloos katak ema ne’e iha abilidade no koñesementu ba apoiu prosesu konstrusaun estadu.

“Ha’u husu ba imi formandu sira nu’udar jerasaun foun atu prepara aan ba futuru hodi sai fali luta na’in foun, sai ativadores, no sai produtores ba dezenvolvimento nasionál iha rai doben Timor Leste,” tenik Xanana Gusmão.

Lidér Rejisténsia ne’e husu mós ba EIROS atu oferese formasaun ba Timoroan sira ho kualidade la’os duni kuantidade tanba prodúz ema ho kualidade sei tulun atu dezenvolve família, sosiedade, komunidade no nasaun.

Jornalista : Tomé Amado

Editór       : Agapito dos Santos

INFORMASAUN

HAKEREK NO HATÁN

Please enter your comment!
Please enter your name here