Sekretária Estadu Igualdade no Inklusaun, Maria José da Fonseca Monteiro de Jesus. Imajen/ António Goncalves

DILI, 20 fevereiru 2020 (TATOLI)–Sekretaria Estadu Igualdade no Inkluzaun (SEII) ho reprezentante embaixada Kanadá, ohin, lansa espozisaun pintura hodi selebra loron justisa sosiál ho tema “Inkluzaun Sosiál” iha Xanana Reading Room Lecidere.

Liuhosi pintura kontestante sira-nian, Sekretária Estadu Igualdade no Inkluzaun (SEII), Maria José da Fonseca Monteiro de Jesus informa, pintores iha ona komprensaun kona ba inkluzaun sosiál
“Ohin, ami la’o haleu haree imi-nia arte hatudu katak iha ona komprensaun kona ba inkluzaun sosiál no iha mós aspetu justisa ne’ebé importante atu asegura inkluzaun sosiál,” dehan Sekretária Estadu Igualdade no Inkluzaun (SEII), Maria Fonseca, ba ajénsia TATOLI hafoin lansamentu espozisaun ba pintura iha, Lecidere, Dili, ohin.

Ho fundasaun Coalitio for Diversity ND Action (CODIVA) ho HATUTAN no embaixada Kánada nia apoiu, SEII fó parábens.

“Ha’u hakarak fó parábens ba fundasaun CODIVA ho HATUTAN no ha’u mós apresia ho apoiu husi embaixada Kánada,” nia dehan.
Nia esklarese, SEII kontinua halo advokasia no asegura inkluzaun husi komponente hotu maske difisil maibé Governu nafatin halo polítika no halo programa oin-oin hodi asegura inkluzaun.
Enkuantu, manan na’in ba segunda lugar ba espozisaun pintura ne’e, Elizabeth Remilda Sousa hatete presiza hatudu espresaun pintura ba ema seluk.
“Ha’u pintura la’ós buka manan maibé ha’u hakarak ha’u-nia espresaun husi pintura ne’e ema seluk bele haree,” nia dehan ho oin midar.

Pintora Elizabeth hatutan bainhira pintura, ema ne’ebé mak motiva nia mak família depois aprende liuhusi vídeo ne’ebé sempre nia asesu.

“Ha’u motiva hau-nia aan liu husi haree vídeo entaun hahú iha ne’e ha’u pintura uluk mak hau-nia mama nia oin. Pintura prefere liu ba ema nia oin,” nia espresa nia ideia ba jornalista sira.
Elizabeth Remilda sempre espresa nia an liuhusi pintura. Pintura ida ne’e, ba ha’u signikadu tebes no ha’u sei rai ba hau-nia aan iha futuru tanba dala barak ha’u espresa hau-nia aan liuhosi pintura maibé ema bele komprende ha’u,” nia dehan hodi motiva juventude sira.

Kontestante sira ne’ebe tuir kompetisaun pintura hamutuk na’in 25 maibé na’in 4 mak sai manan na’in. Primeiru lugar mak Zeferino do Cristão, segundu lugar Elizabeth Remilda Sousa, terseiru lugar mak Avelino Pires no kuartu lugar mak Zeferino Miranda.

Grupu foinsa’e HATUTAN serbisu hamutuk ho fundasun CODIVA no embaixada Kanadá selebra loron Mundiál ba Justisa Sosiál ho objetivu atu promove foinsa’e sira-nia talentu no eduka komunidade sira kona ba valór husi inkluzaun no respeita malu no laharee ba kór, rãs, relijiaun, kultura no seluk tan.

Partisipante sira ne’ebé partisipa ba lansamentu ne’e mai husi Diretór Jerál Sekretáriu Estadu Arte no Kultura (SEAK), SEII, Provedória Direitus Umanus no Justisa (PDHJ-sigla portugés), reprezentante embaixada Kánada, embaixadór Nova Zelándia, komisária Nasionál Direitu Labarik (KNDL), Diretora Fokupers no Diretór Asian Justice and Rigts (AJAR).

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here