DILI, 21 fevereiru 2020 (TATOLI)—Tanba interese nasionál aas liu buat hotu-hotu entaun liuhosi Konferénsia Nasionál Ekstraordinária Partidu Demokrátiku (PD) deside hamutuk ho Partidu Congresso Nacionál da Reconstrução de Timor (CNRT).
Sekretáriu Jerál Partidu Demokrátiku (PD), António “Kalohan” da Conçeição hateten, maske iha entrevista ho jornalista sira Prezidente CNRT, Kay Rala Xanana Gusmão hateten rekursu ikus liu mak eleisaun antesipada maibé Xanana simu fali hanoin hosi partidu balun atu ba forma koligasaun foun.
“Ami deside hamutuk ho CNRT tanba interese nasionál aas liu buat hotu-hotu. Ba GMN Maun Boot Xanana dehan solusaun justa no demokrátiku mak Eleisaun Antesipada. Maibé, nia husik buat ne’ebé mak nia dehan hodi simu fila-fali hanoin hosi ami hotu ba forma koligasaun foun. Ne’e abnegasaun. Nia abnega tan de’it ba nasaun, ne’e hahalok fuan boot ninian,” dehan António “Kalohan” da Conçeição ba jornalista sira iha Tuana-Laran, Dili, ohin.
Hatán kona-ba esperiénsia moruk iha pasadu, Kalohan hatán, esperiénsia ho CNRT loos duni akontese iha V Governu Konstitusionál mosu remodelasaun no restruturasaun hamsou VI Governu ne’ebé Primeiru Ministru, Rui Maria de Araújo mai hosi partidu istóriku FRETILIN mak lidera.
Iha remodelasaun ne’e, nia esplika, CNRT mak lidera bloku tenke halo estratéjia tanba fronteira marítima hodi bele inklui fali elementu partidu FRETILIN nian to’o Primeiru-Ministru tenke husik nia kargu hodi fó fali-fali Primeiru-Ministru ba partidu FRETILIN.
“Ne’e situasaun ida-ne’ebé CNRT halo. Tanba ne’e mak PD sofre redusaun hosi membru governu, ne’ebé implika ba ami-nia Prezidente Partidu, Mariano “Assanami” Sabino, ne’ebé asume knaar nu’udar Ministru Agrikultura no Peskas maibé Prezidente CNRT mós husik nia kargu hanesan Primeiru-Ministru,” nia hateten.
Hirak ne’e akontese, tuir nia, intensaun prinsipál tanba tenke iha kompromisiu ida hamutuk ba fronteira marítima nune’e iha parlamentu ne’e bele sai votu ida de’it.
“Ida-ne’e mak ami-nia esperiénsia ho CNRT, ne’ebé dalabarak ema ko’alia dehan esperiénsia ida-ne’e la di’ak maibé ami la konsidera ida-ne’e hanesan hasees PD. Tanba, ami mós intende saida mak interese nasionál fronteira marítima,” nia esplika.
Nia hatutan, iha mós esperiénsia ho FRETILIN ne’ebé maka hosi Primeiru Governu to’o Terseira Governu, PD mós sofre buat barak hosi partidu FRETILIN.
“Iha governasaun FRETILIN, Fernando “La Sama” de Araújo tenke hasoru investigasaun iha Prokuradoria Jerál Repúblika tanba de’it dehan halo alegasaun hasoru Primeiru-Ministru, Ministru kona-ba subornu ba Conoco Philips. Ami simu buat sira-ne’e maibé buat hotu-hotu ami husik liu, iha 2017, biar moruk ami ba hamutuk ho FRETILIN,” nia informa.
Esperiensia sira ne’e, nia haklaken, PD kompara esperiénsia ne’e CNRT la vale atu PD nafatin ho CNRT ba nasaun. Tanba ne’e, nia dehan, PD laiha dúvida nafatin ho CNRT no nunka konsidera dehan PD hamutuk ho CNRT hanesan esperiénsia aat.
Ho koligasaun foun ne’ebé sei mosu iha tempu badak, Kalohan subliña, proposta ne’ebé PD propoin ba CNRT mak dahuluk tenke devolve fila-fali konfiansa ba povu nune’e rai ne’e bele moris hakmatek.
Proposta daruak, nia esplika, PD agradese ba Prezidente CNRT, Kay Rala Xanana Gusmão ne’ebé disponibilidade inkondisionál hodi hamriik fila-fali iha oin lidera hikas koligasaun ida nomós devolve fila-fali konfiansa ida ba setór privadu nu’udar parseiru ba prosesu dezenvolvimentu ida iha rai ida-ne’e.
Notísia Relevante: Ohin, Posivelmente Fó-Sai Koligasaun Foun Lidera Hosi CNRT
Jornalista : Evaristo Soares Martins
Editór : Cancio Ximenes
Apresia ho PD ninia desijaun nb hakotu liu hs votus maioria hs Kuadrus no dirijentes hs Munisipius sr ht. Identiku ho naran n rasik, parabens