Diretór Jerál MOP, Rui Hernani. Imajen/Florencio Miranda Ximenes

DILI, 21 fevereiru 2020 (TATOLI) – Hafoin Governu inaugura Auto-Estrada Suai iha loron 17 novembru 2018, dalan atu hakur ba pedestre (ema la’o-ain) sira laiha, tanba ne’e difikulta movimentu komunidade ne’ebé hela besik auto-estrada atu ba to’os, natar  no vizita família nia rate.

Relasiona ho kestaun ne’e, Ministériu Obra Públiku (MOP) sei hein aprovasaun kontratu suplementár husi Komisaun Nasionál Aprovizionamentu (CNA-sigla portugés) atubele hahú obra ne’e.

Diretór Jerál MOP, Rui Hernani, informa presiza konstrui dalan hakur rua iha Auto-Estrada Suai atu fasilita abitante iha área Holbelis hodi sira bele hala’o movimentu ba to’o natar.

“Foin daudaun ita-nia estudu ba konstrusaun auto-estrada la konsege tau kustu ba dalan hakur, nune’e ita hein aprovasaun kontratu suplementáriu atu hahú konstrui obra ne’e hodi ita-nia komunidade bele hakat bainhira sira iha atividade iha área besik auto-estrada”, nia tenik ba Agência TATOLI, iha knaar fatin, Bebora, sesta-ne’e.

Dirijente ne’e hateten, daudaun ekipa MOP ho Ajénsia Dezenvolvimentu Nasionál (ADN) hala’o verifikasaun iha terrenu atubele dezeña dalan hakur rua, nune’e kompañia konsórsiu Xina Overseas Engineering Group Co.Ltd, no Xina Railway First Group Co.Ltd, bele hahú halo konstrusaun.

“Ami tenke kria kondisaun atu sira (abitante) bele hakur, maibé orsamentu aprova hotu ona ho pakote reabilitasaun auto-estrada nian”, nia informa.

Ho nune’e, MOP kontinua halo kontratu suplementáriu ho kompañia konsórsiu sira.

“Rai monu hodi estraga auto-estrada ne’ebé tama responsabilidade Governu nian, ami hala’o ona kontratu suplementáriu ho kompañia no sira halo hela retensaun”, nia akresenta.

Kompañia mós hahú reablita auto-estrada ne’ebé hetan reparasaun estragu tanba dezastre naturál kuaze metru 15,17 no ne’ebé daudaun ne’e kompañia hahú halo retensaun no ninia kustu hetan ona vistu préviu husi Tribunál Kamara Konta.

Antes ne’e, Ministru Obra Públika, Salvadór Eugénio Soares dos Reis Pires, hatete auto-estrada ne’ebé kotu iha Fatukai to’o Ponte Mola iha Suai, Governu mak sei toma responsabilidade hodi halo retensaun ho kustu orsamentu millaun $1-resin tanba auto-estrada ne’e kotu impaktu husi dezastre naturál.

Konsellu Ministru Aprova Deliberasaun Proposta Auto-Estrada

Konsellu Ministru mós aprova deliberasaun retensaun ba proposta auto-estrada Suai husi Fatukai to’o Mola ne’ebé hetan estragu tanba dezastre naturál.

Proposta alterasaun ne’e aprezenta husi MOP ba kontratu konstrusaun Auto-Etrada Suai ICB/007/MPNR-2013 ne’ebé selebra ho konsórsiu Xina Overseas Engineering Group Co.Ltd, no Xina Railway First Group Co.Ltd, hahú retensaun husi Fatukai to’o mota Mola.

Auto-Estrada Suai inaugura iha 17 novembru 2018, husi Ministru Obra Públika, Salvador Eugénio Soares dos Reis Pires no Ministru Estadu Prezidénsia Konsellu Ministru, Hermenegildo Augusto Cabral Pereira ‘Agio Pereira’.

Mega projetu auto-estrada husi Suai to’o Beaço, Viqueque tuir dezeñu ninia naruk kilómetru 30.355 no luan metru 25 ho konstrusaun iha faze haat.

Faze dahuluk hosi Suai ba Fatukai, faze daruak hosi Fatukai ba Betano, faze datoluk hosi Betano ba Natarbora no faze ikus husi Natarbora ba Beaço.

Kustu ba konstrusaun no supervizaun auto-estrada husi tinan 2012 to’o 2017 hamutuk millaun $535, la inklui kustu sira kona-ba estudu viabilidade, estudu detalladu tékniku, no indemunizasaun ba rai.

Jornalista: Florencio Miranda Ximenes

Editora: Julia Chatarina                                                                                                                                           

1 KOMENTÁRIU

  1. MOP ne’e iha asesor barabarak ho salariu mos mesa boot de’it, nuxa maka dalan hakur oan ne’e de’it mos konstrusaun hotu ona maka foin hanoin kona fali. Ne’e aat maka ne’e. Ida fali dehan auto estrada ne’ebe aat kuaze kilometru hira ne’e impaktu husi dezastre natural, ha’u pesoalmente duvida uitoan ho razaun ida-ne’e tanba molok ezekuta obra ne’e iha uluk ona estudu. Buat barak la’o la loos.

HAKEREK NO HATÁN

Please enter your comment!
Please enter your name here