Konselleru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori Bucar. Imajen Tatoli/Eugénio Pereira

DILI, 21 fevereiru 2020 (TATOLI)—Konselleiru Másimu Partidu Kmanek Haburas Unidade Nasionál Timor Oan (KHUNTO), José “Naimori” dos Santos Bucar hateten, Partidu KHUNTO sei deside hamutuk ho Partidu Congresso Nacional de Reconstrução de Timor (CNRT).

Naimori informa, razaun KHUNTO deside ba hamutuk ho CNRT tanba iha prosesu movimentu polítiku ne’ebé la’o, CNRT mak dere uluk Partidu KHUNTO nia odamatan.

“Atu ba apoia ba sé-sé, KHUNTO nia pozisaun haree ba ida-ne’ebé mak bolu uluk. Tanba, agora CNRT mak bolu uluk ami. Se ita husik de’it mós ladún di’ak. Ami hein to’o agora, FRETILIN nunka mai no hosi PLP mós seidauk mai. Tanba ne’e, pozizaun KHUNTO nian ba hamutuk ho CNRT,” Konselleiru Másimu KHUNTO, José “Naimori” dos Santos Bucar, informa ba Agência TATOLI iha nia rezidénsia, Manleuana, Dili, ohin.

Nia parte seidauk bele fó-sai, proposta ne’ebé KHUNTO atu hato’o ba Partidu CNRT bainhira forma konfigurasaun foun.

Nia rekoñese, maski Orsamentu Jerál Estadu 2020 xumba iha Parlamentu Nasionál tanba CNRT mak vota abstensaun maibé Naimori hatán ho liafuan badak “alin, polítika ne’e dinámika”.

Nia haktuir, durante ne’e, Partidu CNRT mak sempre fó hanoin ba Partidu KHUNTO, nune’e bele hakotu tiha impase polítika ida-ne’e.

“Ho ida-ne’e mak ita mós bá ko’alia ona ho Maun Xanana nomós lideransa sira seluk para hanoin di’ak ba rai-ida ne’e,” nia dehan.

Nia akresenta, maske KHUNTO deside hamutuk ho partidu ne’ebé lidera hosi Kay Rala Xanana Gusmão maibé polítika ne’e dinámika maibé KHUNTO prontu asegura kualkér Governu ida, importante mak impase polítika ne’e tenke hotu.

“KHUNTO sei asegura partidu ne’ebé bolu uluk tanba ita kadeira lima de’it. Ita laiha direitu atu bolu partidu seluk.  Ami iha semana ida-nia laran hahú hosi estrutura nasionál ho mós distritu (munisípiu), ami sei halo enkontru partidu nian hodi fó-sai ofisialmente,”  nia dehan.

Nia hatutan, KHUNTO nia hakarak mak impase polítka ne’ebé la’o tempu naruk ne’e tenke hakotu lalais, nune’e labele kontinua fó impaktu ba roda ekonomia rai-laran.

Naimori rekoñese Primeiru-Ministru, Taur Matan Ruak,nu’udar ema ida-ne’ebé profisionál tebes tanba la obriga ema ida ba tuir ema-ida nia hakarak.

“Maun Taur iha vontade no iha interese kontribui duni ba nasaun ida-ne’e. Nia mós fó hanoin ba ha’u katak oinsá mak ita bele hakotu impase polítika ida-ne’e. Nia fó livre ba partidu hotu-hotu bele koopera, nia la dehan tenke tuir PLP. Maun Taur ne’e profisionál tebes. Nia la obriga ema-ida atu tuir ema-ida,” nia esplika.

Nia afirma, relasaun KHUNTO ho partidu FRETILIN, CNRT no PLP amigável tebes tanba ezisténsia partidu polítiku sira hakarak nasaun ne’e la’o bá-oin ho prósperu.

“Partidu hotu-hotu sempre konfortável ho KHUNTO, tanba buat ida polítika ne’e hanesan instrumentu ida,” nia hateten.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here