Estudante Timor oan sira husi Wuhan wainhira to iha aeroprtu Nicolao Lobato,Komoro Dili, 21 Febreiru 2020.Imajen/Antonio Goncalves

DILI, 21 fevereiru 2020 (TATOLI)-Bolseiru Timoroan hamutuk na’in 17 ne’ebé maka evakua husi Sidade Wuhan Xina iha loron 05 fulan-fevereiru ba Nova Zelandia, sesta ohin to’o hikas iha Timor-Leste ho kondisaun saúde di’ak no livre hosi coronavirus.

Ministériu Negósiu Estranjeiru no Kooperasaun maka akompaña estudante bolseiru hirak ne’e to’o iha Dili.

Notísia Relevante : MNEK Lori Fila Estudante Na’in-17 iha Nova Zelándia Mai TL

Iha konferénsia Imprensa iha Aeroportu Internasionál Nicolau Lobato Dili, Diretóra Prestasaun Saúde, Ministériu Saúde, Odete Viegas da Silva husu ba Timoroan seluk atu labele deskrimina bolseiru na’in 17 ne’e tanba médiku Nova Zelandia sertifika ona sira katak livre hosi coronavirus.

Notísia Relevante :Governu Xina Autoriza Evakua Bolseiru Timoroan iha Wuhan

“Husi parte saúde nian apela ba públiku katak estudante sira-nian saúde ita hotu hatene katak hela ona iha karantina durante loron 14 iha Nova Zelandia,” esplika Diretóra Odete Viegas.

Diretóra ne’e reprezenta Ministériu Saúde hato’o agradese barak ba Governu Nova Zelandia tanba fó ona asisténsia ba bolseiru sira durante evakuasaun, hela iha kuarentena to’o ohin fila hikas mai Timor-Leste.

Estudante hirak ne’e sei fila hikas ba hela hamutuk ho família ida-idak maibé Ministériu Saúde sei kontinua akompaña no fó tratamentu saúde bainhira iha nesesidades.

Notísia Relevante :Bolseiru Timoroan 17 Agradese Governu TL, Xina no Nova Zelándia

Iha fatin hanesan, Sekretáriu Jerál Ministériu Negósiu Estranjeiru no Kooperasaun, Jorge Camoes, hateten agradese ba Maromak no ema hotu hotu liliu Governu Xina, Nova Zelandia no Timor-Leste nia tulun maka ohin konsege lori fila Timoroan Na’in 17 mai rai-laran.

Nune’e mós Embaixadór Nova Zelandia ba Timor-Leste, Pbilip Hewitt, informa estudante sira ne’e evakua ba Nova Zelandia iha loron 5 fulan-fevereiru no hela iha fatin kuarantena durante loron 14.

Notísia Relevante :Governu TL Hato’o Agradesimentu Ba Governu Nova Zelándia Nia Apoiu

“Governu Nova Zelandia kontente tebes no apoiu di’ak ba estudante sira, no lori sira husi Wuhan Xina ba Nova Zelandia no akompaña sira iha Nova Zelandia to’o ikus lori sira mai Timor-Leste ida ne’e mak dehan amigu sira halo ba malu,”informa Embaixadór Pbilip Hewitt.

Diplomata Nova Zelandia mós agradese ba Governu Xina tanba aseita ona pedidu NZ nian hodi evakua estudante Timoroan hosi sidade Wuhan.

Notísia Relevante :Bolseiru Timoroan iha Xina Sente Ameasadu ho Virus Corona, Husu Governu atu Evakua Sira

Ikusliu estudante, Nicodino da Cruz, agradese ba Governu Timor-leste, Governu Nova Zelandia tanba ho kooperasaun di’ak maka ohin konsege fila sira mai hamutuk fali ho família.

“Ohin loron ami hamrik iha ne’e ho haksolok tanba ami to’o ona ita-nia rain no bele hasoru malu fali ho família sira,”espresa nia ho kontente.

“Ha’u mós hato’o ba públiku tomak katak ami liu ona Kuarentena durante loron 14 no ami nia situasaun nafatin normál no husu ba sosiedade tomak nafatin simu ami hanesan Timoroan,” tenik tan.

Notísia Relevante :KM Aprova Osan $1.5 Millaun Atu Prevene Virus Corona

Estudante 17 ne’e kompostu hosi mane na’in neen no feto na’in 11

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here