Diretór Organizasaun Naun Governamentál Saude Ba Ema Hotu (SABEH), André Belo. Imaje: Felicidade Ximenes

DILI, 19 fevereiru 2020 (TATOLI)—Diretór ezekutivu Saúde Ba Ema Hotu (SABEH), Andrezinho Belo hateten, embaixadór Timor-Leste foun ba Reinu Unidu, Gil Costa, sai mós hanesan embaixadór SABEH nian iha Reinu Unidu.

“Embaixadór ba Reinu Unidu hanesan mós kolaboradór SABEH nian. Alende sai hanesan embaixadór Timor ba Reinu Unidu, nia mós hanesan embaixadór SABEH iha ne’ebá. Hanesan mós iha Austrália, Embaixadór Abel Guterres, hanesan mós embaixadór SABEH nian, antes ne’e hanesan kolaboradór SABEH,” dehan Andrezinho Belo ba Ajensia TATOLI iha nia knar fatin, iha fatin Eskola Esternatu São José, Delta, Comoro, ohin.

Antes ne’e, embaixadór Timor-Leste foun ba Reinu Unidu, Gil da Costa, bainhira partisipa iha Asembleia Jerál Ordinária Dahuluk SABEH nian ne’ebé realiza iha 15 fevereiru 2020, nia hateten nu’udár reprezentante Estadu no povu Timor-Leste iha Reinu Unidu, nia hamutuk ho diplomata sira sei hakas aan atu hetan apoiu ruma ba SABEH nia misaun hodi ajuda alkansa SABEH nia objetivu.

“Nu’udár reprezentante Estadu no povu Timor-Leste iha Reinu Unidu, ha’u hamutuk ho diplomata sira, sei hakas aan atu hetan apoiu ruma ba SABEH nia misaun, atu ajuda alkansa SABEH nia objetivu, liuliu lori saúde besik ba povu iha área remota,” Gil promete.

Bazeia ba organizasaun SABEH nia lema “Saude Ba Ema Hotu, Ba Timor-Leste Ida Ne’ebé Saudavel liu”, Embaixadór Gil da Costa apela apela ba timoroan hotu tenke kontribui hodi liberta povu hosi mukit liuliu hosi moras sira.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here