Vise-Prezidente CCI-TL ne’ebé trata Asuntu Infraestrutura, João Fernandes Alves. Imajen Tatoli/Egas Cristovão

DILI, 21 fevereiru 2020 (TATOLI) – Vise-Prezidente Asuntu Infraestrutura, Kámara Komérsiu no Industria Timor-Leste (CCI-TL, sigla portugés), João Alves, rekoñese katak durante-ne’e setór privadu sira sei depende ba Orsamentu Jerál Estadu (OJE), maibé bainhira ekonomia rai-laran la’o loos no produsaun barak, mak sei la depende tan ba orsamentu estadu.

“Ha’u hakarak dehan kuandu ekonomia la’o ho di’ak, setór privadu la dependénsia ona ba setór públiku. Kuandu produsaun la’o di’ak no importasaun mós di’ak, laiha ona dependénsia orsamentu estadu ba vida setór privadu tanba idaidak hatene prodús no la depende hanesan agora ne’ebé depende tebes ba OJE”, dehan dirijente CCI-TL iha salaun enkontru CCI-TL, Akait, sesta ne’e.

João Alves argumenta, úniku investimentu boot ne’ebé iha OJE mak kapitál dezenvolvimentu.

“Ezemplu kapitál dezenvolvimentu ne’e millaun $400, osan tenke hela ba traballadór másima porsentu 30, tanba ne’e maka iha dependénsia”, nia akresenta.

João Alves observa, ho situasaun polítika rai-laran ne’ebé ladún estavél, afeta maka’as ba ekonomia.

“Ha’u dehan afeta maka’as tanba empreza barak maka hapara ona ninia traballadór, balun hapara to’o na’in-100, balun 50. Kuandu hapara, sira hirak atu han saida? Sé situasaun nune’e nafatin”, nia argumenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here