iklan

NASIONÁL, EKONOMIA, INTERNASIONÁL

Bulgária Hakarak Investe iha Setór Turizmu

Bulgária Hakarak Investe iha Setór Turizmu

Vise Prezidenti Asuntu Infraestrutura Câmara Comersiu Industria Timor-Leste (CCI-TL), João Alves no ekipa soru-mutuk ho Embaixador Bulgária iha Timor-Leste, Petar Andonov, iha salaun enkontru CCI-TL, Akait, Dili, Imagén Mídia CCI-TL.

DILI, 21 fevereiru 2020 (TATOLI) – Vise-Prezidente Asuntu Infraestrutura Kámara Komérsiu no Industria Timor-Leste (CCI-TL, sigla portugés) João Alves, informa nasaun Bulgária hakarak halo investimentu iha setór turizmu Timor-Leste.

João Alves relata asuntu ne’e, hafoin hala’o surumutu ho Embaixadór Bulgária iha Timor-Leste, Petar Andonov, iha sala enkontru CCI-TL, Akait, sesta-ne’e.

“Enkontru ne’ebé ami halo ho Embaixadór Bulgária iha Timor-Leste di’ak tebes. Iha enkontru ne’e ami aprezenta proposta balun ba Bulgária mak hanesan área potensiál hanesan turizmu ne’ebé maka presiza tebes investór sira hodi investe iha setór turizmu”, nia dehan.

Nia realsa, área turizmu  kobre turizmu relijioza, subar fatin gerilleiru sira nian, no mós turizmu máritima nian, liuliu ba iha luku-tasi, ne’ebé di’ak tebes iha mundu. Tanba ne’e, embaixadór konsidera katak potensiál tebes atu investór sira mai halo investimentu iha área turizmu.

Emprezáriu nasionál ne’e afirma, atu investe iha turizmu ne’ebé de’it depende ba nasaun investór, tanba nasaun ne rasik maka sei halo estudu.

“Hafoin ami aprezenta tiha proposta, embaixadór ne’e dehan sira kontente tebes tanba sira haree rasik ho matan iha fatin tasi-ibun, ita nia tasi moos no kapas. Ha’u hateten katak la’os de’it iha parte tasi-ibun, maibé iha fatin balun mak di’ak liután. Ha’u husu embaixadór atu bele ba vizita to’o iha Lautém, Maubisse no fatin sira seluk atu haree beleza iha munisípiu nian”, nia subliña.

Maski nune’e, João Alves, rekoñese molok atu hala’o negósiu sira ne’e, dahuluk sei estabelese akordu bilaterál entre Timor-Leste no Bulgária.

Parte seluk, Embaixadór Bulgaria iha Timor-Leste, Petar Andonov sente kontente bele hala’o sorumutu ho lideransa CCI-TL ni’an hodi ko’alia liután kooperasaun iha área investimentu iha Timor-Leste.

“Horseik ha’u aprezenta ona ha’u nia karta kredensiál ba Prezidente Repúblika no agora ha’u mai halo sorumutu ho CCI-TL hodi ko’alia kona-ba estabelesementu koorperasaun ida hodi esplora área sira ne’ebé bele halo investimentu iha Timor-Leste no ami prontu ajuda Timór hodi halo investimentu”, nia kompromete.

Jornalista: Antónia Gusmão

Jornalista: Julia Chatarina

iklan
iklan

Leave a Reply

iklan
error: Content is protected !!