DILI, 20 fevereiru 2020 (TATOLI)–Sekretáriu Jerál Ministériu Negósiu Estranjeiru no Kooperasaun (MNEK), Jorge Trindade Neves de Camões hateten, Timor-Leste (TL) nakloke atu esplora área kooperasaun ho nasaun tolu mak hanesan Bulgária, Ejiptu no Iraun.

Espresaun ida-ne’e nia haklaken, hafoin nia akompaña embaixadór na’in-tolu husi nasaun-tolu refere hodi entrega karta kredensiál ba Xefe Estadu, Francisco “Lú Olo” Guterres, iha Palásiu Prezidente Nicolau Lobato, Bairru-Pité, Dili, ohin lorokraik.

“Asuntu prinsipál ne’ebé Prezidente Repúblika, Francisco “Lú Olo” Guterres diskute ho embaixadór sira mak Timor-Leste nakloke atu esplora área kooperasaun ho país tolu hanesan Bulgária, Ejiptu ho Iraun. Ita laiha kooperasaun ho sira maibé ita iha determinasaun no prontu atu koopera ho sira,” Jorge hateten.

Nia hatutan, Bulgária espesifikamente espresa ninia vontade atu estabelese polítika konsultasaun atu haree área saida maka Timor-Leste ho Bulgária halo no Konkretamente seidauk iha. Maibé, iha tempu oin, ofisiál husi parte rua haree atu koopera oinsá bele hahú toka iha asuntu espesífiku balun, atu hametin liután kooperasaun.

“Maibé, importante tebe-tebes sira rekoñese dezenvolvimentu polítiku, ekonómiku ne’ebé mak Timor-Leste konsege hetan hafoin Independénsia iha 2002 to’o ohin loron. Sira admira ba ita-nia dezenvolvimentu. Sira admira ba ita-ia demokrasia. Sira prontu atu koopera ho ita, sira fó mós énfaze ba poténsia turizmu ne’ebé mak Timor-Leste iha tanba ita iha poténsia ida di’ak tebe-tebes atu sira mós bele mai kobtribui iha área poténsia sira-ne’e,” nia haktuir.

Sekretáriu Jerál MNEK ne’e dehan, maski ko’alia jenériku de’it maibé Prezidente Repúblika hateten katak espesífiku liu sei entrega ba ezekutivu liuliu Governu atu diskute ho Governu nasaun tolu, hodi determina área ne’ebé mak sei serbisu hamutuk iha tempu oinmai.

Embaixadór na’in-tolu naun rezidénte ne’ebé entrega karta kredensiál ba Prezidente Repúblika iha parte lorokraik mak embaixadór akreditadu Repúblika Bulgária, Petar Andonov, Repúblika Izlámika Iraun, Khoush Heikal Azad, no Repúblika Ejiptu, Ashraf Mohamed Mouguib Sultan.

Tuir ajenda, aban, Prezidente Repúblika sei simu karta kredensiál husi embaixadora Suésia Marina Berg, Holanda, Gustavo Nelson Ayares Ossandon no Reino dos Países Baixos, Lambertus Christiaan Grijns.

Jornalista: Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here