Sekretáriu Estadu Protesaun Sivíl, Alexandrinho Xavier Araújo. Foto Mídia Minist’eriu Interiór

DILI, 20 fevereiru 2020 (TATOLI)—Sekretáriu Estadu Protesaun Sivíl (SEPS) hamutuk ho Ministériu Administrasaun Estatál (MAE) no Autoridade Munisipál, Autoridade Lokál sira iha Munisípiu Dili halo enkontru tékniku ida hodi bele halo koordenasaun no halo kooperasaun hodi prevene dezastre naturál iha pasadu no futuru.

“Ohin, ita halo enkontru tékniku ho autoridade munisipál no autoridade lokál iha Munisípiu Dili, hodi prepara koordenasaun ba futuru no halo kooperasaun di’ak liután hodi prevene dezastre naturál. Iha enkontru ne’e, relata mós ba autoridade lokál sira kona-ba dadus vítima dezastre naturál ne’ebé mak dobru,” dehan Sekretáriu Estadu Protesaun Sivíl (SEPS), Alexandrinho de Araújo, ba Agência TATOLI iha Salaun SEPS, Caicoli, Dili, kinta ne’e.

Nia esplika, bainhira Governu fó tiha apoia emerjénsia ba vítima sira depois dadus foun tama fali de’it maibé Governu laiha evidénsia ruma atu reverifika tanba ne’e Governu presiza koopera ho xefe aldeia, xefe suku, no administradór postu sira.

Tanba, nia esplika, dadus sira-ne’e tenke mai hosi odamatan ida nune’e bele hatene katak dadus ne’e mai husi autoridade lokál sira maski Sekretáriu Estadu Protesaun Sivíl (SEPS) nia ema sira serbisu hela iha baze.

“Ita hotu hatene katak autoridade lokál mak besik liu nia komunidade. Sira mak hatene liu, sira-nia populasaun sé-sé mak afeta ba dezastre naturál,” nia esplika.

Entretantu, Diretór Jerál Ministériu Administrasaun Estatál (MAE), Amandio Paulino hateten, enkontru ida ohin ne’e enkontru tékniku nian ne’ebé prezide husi SEPS hamutuk ho autoridade lokál atu oinsá bele prevene dezastre naturál.

“Ita-nia xefe suku sira servisu kapa’as tanba dadus hirak-ne’e entrega ba Postu Administrativu depois munisípiu no MAE tanba MAE mak prezide kona-ba asaun hafoin haruka ba Konsellu Ministru atu haree no ida-ne’ebé mak bele hetan apoiu urjente,” nia dehan.

Reprezentante líder komunitária, Xefe Suku Lahane Orientál, Trindade do Amaral Pinto Baptista hateten, Governu labele dezobedese hela de’it ho komunidade ne’ebé mak kontinua hela iha mota ninin no hela baleta leten. Tanba, bainhira sira hetan ona kompensasaun entaun sira hakarak halo de’it uma no hela nafatin iha fatin refere.

“Governu labele dezobedese no labele halimar demais ho komunidade ne’ebé la kumpre regra,” nia hateten.

Notísia Relevante: Dadus Vítima Dezastre Naturál Hamutuk 7457

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here