Ekipa husi Arkivu & Muzeu Rezisténsia Timoroan (AMRT-sigla portugés) halo audiénsia ho Sekretáriu Estadu Komunikasaun Sosiál, Merício Juvinal dos Reis ‘Akara’, hamutuk ho ekipa Rádiu Televizaun Timor-Leste, Empreza Públika (RTTL, EP). Imajen/Mídia SEKOMS

DILI, 20 fevereiru 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’, informa Governu liuhosi Sekretaria Estadu Komunikasaun Sosiál (SEKOMS) hakarak kolabora ho Arkivu & Muzeu Rezisténsia Timoroan (AMRT-sigla portugés), hodi divulga informasaun kona-ba dokumentasaun reszisténsia sira, liuhosi kanál Rádiu Televizaun Timo-Leste, Empreza Públika (RTTL, EP).

“Ha’u hamutuk ho Diretór Ezekutivu no Prezidente AMRT, Prezidente RTTL, ko’alia kona-ba oinsá halo kolaborasaun hodi fasilita Muzeu Rezisténsia halo dokumentasaun hodi fó sai programa ne’ebé maka durante iha ba públiku”, tenik Akara iha Palásiu Governu, kinta ne’e.

Nia refere liután, kona-ba projetu dijitalizasaun ne’ebé maka RTTL daudaun ne’e hala’o, bainhira ramata sei oferese kanál espesiál ida ba Muzeu Rezisténsia atu uza, nune’e bele halo produsaun no divulgasaun infomasaun.

Haree husi aspeitu tékniku, nia parte simu ona informasaun katak ekipamentu iha Muzeu Rezisténsia preparadu liu.

“Sira iha ekipamentu atu hahú no ita bele uza kanál foun. Ein termu kontiúdu Muzeu Rezisténsia preparadu liu tanba iha kontiúdu barak maka durante ne’e sira prodús, tanba-ne’e presiza  publika. Ha’u deside RTTL bele fó kanál ida ba sira hodi hahú sira-nian servisu ba publikasaun-nian”, akresenta Akara.

Governante-ne’e rekoñese, kona-ba rekursu umanu, iha funsionáriu SEKOMS barak maka uluk serbisu iha RTTL no iha esperiensia barak. Tanba-ne’e SEKOMS hakarak kolabora hamutuk AMRT.

“Ha’u hakarak dehan katak, iha nível polítika, Governu liuhosi SEKOMS prontu atu apoia. SEKOMS kontente kolabora ho Muzeu Rezisténsia no ami sei apoia saida de’it maka muzeu-ne’e presiza”, nia realsa.

Ba inisitiva ida-ne’e, nia parte husu ba Dirijente RTTL,EP, hodi halo nota entendimentu ida atubele ofisializa.

“Nune’e ita bele iha baze ruma atu halo kolaborasaun atubele iha sustenatabilidade, se lae ita la’o fulan-rua ka tolu de’it, ita paradu fali. Tanba-ne’e, presiza iha akordu ruma atubele asegura iha médiu no longu prazu”, nia argumenta.

Parte seluk, Diretór Ezekutivu no Prezidente AMRT, Hamar Antoninho Batista Alves, hateten, infraestrutura AMRT iha porsentu 96 no daudaun ne’e rekursu umanu maka limitadu oituan hanesan produsaun programa no rekursu implementadór ba programa divulgasaun nian.

“Ha’u haruka karta ida mai SEKOMS atu husu audiénsia atubele trata asuntu refere no hosi rezultadu audiénsia-ne’e maka ha’u sei ba prepara proposta ida mai SEKOMS atu fó apoiu tékniku. Tanba agora iha rejime duodésimu la permite atu loke vaga foun atubele hetan ita-nian tékniku ne’ebé maka adekuadu ba programa refere”, nia informa.

Nia subliña, AMRT mós sei prepara referénsia ruma atu difine tarefa kada ekipa ba produsaun no atividade AMRT nian, nune’e kanál labele temporária maibé fixu no permante ba sidadaun tomak iha nível nasionál no internasionál atubele asiste pasajen luta rezisténsia Timor-Leste.

Tuir Dirijente ne’e, programa ne’ebé maka AMRT sei halo maka mensajem antigu sira ne’ebé iha ona, hanesan filme dokumentáriu sira ne’ebé husi parte-ida maka entevista ho girilleru sira.

Hamar Antoninho  informa tan, pur volta 484 pesoál ne’ebé mak sei sai resposável ba kaixa no estafeta abrigu gerilleru.

“Ha’u entrevista ema barak ona no sira la asesu ba sira nia istória ne’ebé arkiva de’it sira nia istória. Tanba-ne’e, agora tempu atu públiku bele hatene pasajen luta-nian hosi gerilleru idaidak ne’ebé ami sei halo entrevista liuhosi programa-ne’e”, hateten Antoninho.

Iha fatin hanesan, Prezidente RTTL,EP , Francisco da Silva Gari, hateten dadaun ne RTTL iha prosesu atu muda husi sistema analog ba dijitál. Tanba-ne’e, kuandu ramata sei oferese kanál ida ba Muzeu Rezisténsia atu halo divulgasaun ba atividade.

“Agora ita haree mudansa iha RTTL hosi analog ba digitál, ne’ebé iha ona porsentu 80. Kuandu prosesu-ne’e konklui ona maka ita bele oferese kanál ida ba Muzeu Rezisténsia atu divulga informasaun ne’ebé maka sira iha, liga ho dokumentasaun resisténsia iha Timor-Leste”, nia argumenta.

Francisco Gari hateten, kooperasaun entre RTTL no Muzeu Rezisténsia ba divulgasaun atividade, sei akontese iha fulan-jullu, bainhira programa dijitalizaun RTTL atinje ona porsentu 100.

Jornalista Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here