Ministru Justisa, Manuel Cárceres . Imajen Tatoli/Egas Cristóvão

DILI, 20 fevereiru 2020 (TATOLI) – Ministru Justisa, Manuel Cárceres, argumenta atu kria Sistema Indentifikadór Únika Sidadaun, presiza mós iha lejizlasaun atu suporta ba dadus pesoál molok implementa sistema ne’e, tanba iha artigu 36 Konstituisaun Repúblika Demokrátika Timor-Leste (RDTL) sita kona-ba dadus privasidade.

Governante ne’e ko’alia asuntu ne’e relasiona ho desizaun Konsellu Ministru ne’ebé hakarak kria ekipa interministeriál atu hahú prepara sistema indentifikadór únika sidadaun

“Iha ona estudu ida hosi ita-nia parseiru sira no kartaun identifikasaun únika ne’e ajuda ita hala’o ita-nia prosesu sira, maibé buat ida maka ita tenke hatene maka iha artigu 36 Konstituisaun RDTL hateten privasidade ne’e inviolável, katak ema-nia privasidade ita labele book. Tanba ne’e, atu hakat to’o ba Sistema Indentifikadór Únika Sidadaun, importante tebes mak Lei Protesaun Dadus Pesoál, tanba dadus pesoál ema-nian labele divulga no tenki iha ema-ida mak responsável”, dehan Manuel Cárceres iha Palásiu Governu, kinta ne’e.

Notísia Relevante: Governu Hakarak Kria Sistema Indentifikadór Úniku Sidadaun

Ba inisiativa ida-ne’e, nia realsa, MJ simu ona hanoin balun husi Ministériu Reforma Lejizlativa no Asuntu Parlamentár (MRLAP) ba kriasaun sistema sidadania ne’e tanba iha vantajen.

Tuir nia, bainhira laiha Lei Protesaun Dadus Pesoál labele avansa ba Sistema Indentifikadór Únika Sidadaun tanba sistema ne’e rasik kona-ba ema ninia dadus privadu.

“Vantajen ne’ebé ita hetan maka númeru identidade úniku ne’e ita ba fatin ne’ebé ita-nia númeru ne’e nafatin hela de’it, hanesan trata Billete Identidade (BI) no Seguransa Sosiál, maibé ninia dezvantajen maka ita laiha lei ida proteje ita-nia dadus pesoál, tanba ita-nia dadus ne’e naklekar hela hanesan iha mídia sosiál. Ne’e labele akontese tanba viola artigu 36 KRDTL ne’ebé privasidade ne’e tenke proteje ho lei protesaun dadus pesoál.

Nune’e, Manuel Cárceres informa MJ hamutuk ho MRLAP sei prepara Lei Protesaun Dadus Pesoál.

Jornalista: Antónia Gusmão

Edotora: Julia Chatarina

HAKEREK NO HATÁN

Please enter your comment!
Please enter your name here