Mariano Assanami Sabino. Imajen/Antonio Goncalves

DILI, 20 fevereiru 2020 (TATOLI)—Prezidente Partidu Demokrátiku (PD), Mariano “Assanami” Sabino hateten, Partidu Demokrátiku (PD) sei fó resposta ba proposta hosi Partidu Congresso Nacional de Reconstrução de Timor (CNRT) no Partidu Libertasaun Populár (PLP) iha tempu badak.

“Entre proposta hosi CNRT no PLP ne’e di’ak hotu maibé depois mak sei resposta. Impase polítika ne’ebé akontese divia grande inkluzaun mak di’akliu no grande inkluzaun bele ba fali inkluzaun de’it maibé partidu balun la bá. Ami-nia hanoin mak ida-ne’e divia CNRT no FRETILIN tuur hamutuk hodi konvida ami ki’ik sira hamutuk,” Mariano “Assanami” Sabino informa liuhosi konferénsia imprensa iha sede PD, Colmera, kinta ne’e.

Nia esplika, estrutura PD nasionál nian rona ona rekomendasaun hosi estrutura munisípiu sira, tanba ne’e PD la deside agora maibé sei sumariza rekomendasaun hirak-ne’e hafoin fó resposta ba proposta rua ne’e.

“Ami-nia hanoin mak ida-ne’e. Ami bele iha ne’ebé de’it no bele ho sé de’it maibé ami-nia governasaun ne’ebé hola-parte ne’e tenke nakloke. Tenke nafatin inkluzaun. Partidu seluk bele tuur. Ema independente bele tama tanba Governu ida-ne’e atu rezolve impase ida,” dehan Assanami.

Tanba, nia afirma, PD kaer de’it ba liafuan importante sira hanesan governasaun ne’e salvasaun nasionál la’ós IX Governu, PD prontu foti risku tanba ne’e la’ós eleisaun normál ida, PD laiha rezerva ba sé de’it. PD prontu no durante ne’e partidu sé de’it laiha relasaun di’ak ho PD maibé iha salvasaun nasionál PD prontu la’o.

”Entaun, buat ne’ebé akontese iha pasadu PD hamutuk FRETILIN la’o, iha mós ladi’ak ho FRETILIN. La’o ho CNRT dalaruma sai iha dalan klaran mós iha. Situasaun barak mak akontese. Liafuan xave mak ne’e, buat sira-ne’e hotu sai lisaun ba ami aprende kontinua hamriik maibé ami la uza ida-ne’e impede atu salva nasaun,” nian hatutan.

Prezidente PD ne’e akresenta, proposta ne’ebé PD iha mak governasaun labele hamriik ho taka-an no fasilita governasaun ida atu hanehan Governu ida seluk. Tanba, ne’e la’ós manán ka lakon maibé ida-ne’e atu rezolve de’it impase polítika.

Nia hateten, tuir PD nia proposta bainhira kuadru PD ne’ebé envolve Governu la presiza uza karreta Estadu nian maibé uza de’it karreta bainbain. Kuadru balun ne’ebé laiha karreta bele uza taxi no transporte publiku.

“PD dehan sakrifika dala-ida tan mós ami prontu fó kakorok”, Assanami hateten.

Notísia Relevante: Rezultadu Husi Konferénsia, PD Prefere Governu Grande Inkluzaun

Jornalista : Evaristo Soares Martins

Editor      : Cancio Ximenes

HAKEREK NO HATÁN

Please enter your comment!
Please enter your name here