Vise Ministru ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis. Imajen: TATOLI

BAUCAU,19 fevereiru 2020 (TATOLI)-Vise-Ministru ba Dezenvolvimentu Estratéjiku Saúde, Bonifácio Maucoli dos Reis, tersa (18/02/2020) halo lansamentu ba kuadru informasaun Asembleia Saúde Suku (ASS) iha Aldeia Caisido, Suku Trilolo, Postu Administrativu Baucau Villa Munisípiu Baucau.

Kuadru Informasaun ASS ne’e atu enkoraja partisipasaun komunidade ba dezenvolvimentu setór Saúde liliu prevensaun moras oioin.

“Ho estabelesimentu ASS iha Suku bele sai nu’udar parseiru servisu hamutuk ho profesionál saúde sira iha nivél Kuidadu Saúde Primaria, Sekundária, no mós tersiária,”dehan, Governante liuhosi Komunikadu ne’ebé maka Agência TATOLI, asesu kuarta ohin.

Nia dehan kuadru avizu ne’e mós sei tulun komunidade atu hato’o sira-ninia preokupasaun relasiona ho prestasaun saúde ne’ébé presta hosi pesoál saúde.

Ministériu Saúde estabelese ona kuadru informasaun Asembleia Saúde suku iha Munisípiu rua, iha Baucau implementa iha área Caisido, Suku Trilolo no Munisípiu Bobonaro estabelese iha Suku Purugoa, Postu Administrativu Cailaco.

“Mai ita hamutuk lolo liman ba malu hodi kontribui ba dezenvolvimentu seitór saúde nian,”apela Vise Ministru, Bonifácio Maucoli dos Reis.

Programa ne’e inisía kedas iha Governu da-lima nian ho programa esensiál haat maka Asembleia Saúde Suku, Kuadru Saúde Suku, Kuadru Sidadaun Partisipasaun no Komunidade iha Planeamentu Programa Saúde.

No programa ne’e foin maka implementa iha mandatu governu daualu ho projeitu pilotu iha Munisípiu Baucau, iha Suku Trilolo no Suku Purugoa, Postu Administrativu Cailaco, Munisípiu Bobonaro.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here