Ministru Justisa, Manuel Cárceres da Costa. Imajen/António Gonçalves

DILI, 20 fevereiru 2020 (TATOLI)–Ministru Justisa (MJ), Manuel da Costa Cárceres, ohin, iha Palásiu Governu, hala’o enkontru ho Primeiru-Ministru (PM), Taur Matan Ruak, hodi relata progresu servisu Ministériu Justisa nian durante tinan 2019.

Notísia Relevante : MJ Sei Loke Atendimentu Pasaporte Eletróniku iha Munisípiu

Ministru Manuel da Costa Cárceres, informa ba jornalista sira hafoin soru-mutuk ne’e katak prosesu servisu ne’ebé MJ halo atu monta sistema emisaun pasaporte eletróniku  iha munisipiu sira ne’ebé daudaun kontinua la’o hela, nune’e bele fasilita liután sidadaun sira atu trata pasaporte iha de’it munisípiu.

Manuel Cárceres mós informa ba PM Taur kona-ba rendimentu arrendamentu rai Estadu nian iha 2019 ne’ebé konsege hatama ona osan ba kofre Estadu hamutuk milaun $4-resin, mezmu iha sidadaun barak mak seidauk kumpre nia devér  atu selu arrendamentu ba Estadu.

“Ha’u ko’alia ho Primeiru-Ministru atu halo oinsá mak obriga sira selu, tanba ne’e iha tempu badak sei halo rezolusaun ruma lori mai Konsellu Ministru aprova nune’e hamate tiha kontratu ba maluk ne’ebé la selu,” hatete Manuel Cárceres.

Notísia Relevante : DNTP Sei Reativa Selu Taxa ba Uma Estadu

Hatán kona-ba númeru arrendamentu rai ne’ebé la selu, Manuel Cárceres lia tun dehan, nia labele ko’alia sai tanba tuir kontratu sijilu kontratuál labele hatete sai ba públiku.

Ministru Manuel Cárceres mós informa ba PM Taur kona-ba nia pozisaun atu hadi’a servisu sira iha Diresaun Nasionál Terras Propriedade (DNTP) ho dalan rua; ida mak korrije no hadi’a sira-nia hahalok, ida fali mak  tenke halo impozisaun ho lei.

Kona-ba Servisu Rejistu Notariadu, Ministru Manuel Cárceres halo ona despaixu atu halo investigasaun. Tanba, tuir nia, ema barak hosi estranjeiru mai reklama nia rikusoin lori nasionalidade timorense kaer pasaporte no billete identidade, kuandu tuir lei maluk sira-ne’e labele karik, ne’ebé tenke iha investigasaun ida nune’e bele fó forsa ba ministru atu foti desizaun.

“Ha’u agora labele dehan lai totál hirak anula, maibé buat sira-ne’e akontese tanba ita-nia maluk sira iha notariadu halo sala no  daudaun ne’e iha investigasaun,” Manuel Cárceres hateten.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here