Koordenadora Programa Saúde Ba Família Munisípiu Dili, Eufrosina Antónia da Silva Pereira/Imajen Osória Marques

DILI, 19 fevereiru 2020 (TATOLI)-Koordenadora programa Saúde Ba Família Munisípiu Dili, Eufrosina Antónia da Silva Pereira hateten, tuir dadus ne’ebé bazeia ba sistema informasaun Saúde Munisipál Dili nian ba tinan 2019, iha Munisípiu Dili populasaun sira ne’ebé afetadu ba moras infesaun vias respiratóriu hamutuk ema na’in 190.582

Moras ne’e mosu, nia hatutan, tanba kauza husi saneamentu ijíene báziku iha Munisípiu Dili ne’ebé la saudavel. Entaun, tuir nia, bele hamosu moras kulit ne’ebé afeta ba populasaun hamutuk ema na’in 43.197 no moras diarea hamutuk ema na’in 31.184.

“Tuir dadus ne’ebé mak ami rekolla, moras aas liu primeiru mak moras infsaun vias respiratóriu altu, segundu moras kulit no ikus mak moras diarea ne’ebé kauza husi saneamentu ijíene báziku mak la saudavel. Moras hirak ne’e akontese tanba komunidade sira seidauk asesu sanitáriu, bee-moos ho di’ak, soe foer arbiru no animál sirkula iha fatin-fatin,” dehan Eufrosina Antónia da Silva Pereira ba Ajénsia TATOLI iha Salaun Xanana Sport Center, Bairru dos Grilhos, Dili, ohin.

Tanba, nia informa, baziea ba dadus UNICEF iha 2019 nian hatudu katak populasaun sira ne’ebé asesu ba sanitáriu ho di’ak atinji ona ba 7% hela no populasaun sira ne’ebé seidauk asesu ho di’ak mak hela ho 3%.

“Tanba ne’e, ita atu serbisu makaas ne’e ba provokasaun 3% atu nune’e ita presiza halo sosializasaun no sensibilizasaun liuhosi autoridade lokál ba komunidade sira iha fatin ida-idak,” nia esplika.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here