Diretór Institutu Defeza Nasionál, Donacioano Costa Gomes ‘Pedro Klamar Fuik’, halo konferénsia imprensa iha Palásiu Governu, kuarta (20/02). Imajen/Mídia-IDN

DILI, 20 fevereiru 2020 (TATOLI)–Diretór Institutu Defeza Nasionál (IDN), Donaciano Costa Gomes ‘Pedro Klamar Fuik’, komprometidu ba futuru institutu ne’e sei kapasita membru FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL), liuhosi Kursu Promosaun Superiór (KPS) no Kursu Promosaun Estadu Maiór (KPEM) atubele profisionaliza liután instituisaun rua ne’e.

“Ami-nia papél maka profisionaliza profisionál sira ne’ebé maka eziste ona hanesan Forsa Armada, Polísia Nasionál no Funsaun Públika, atu serbí interese nasaun nu’udar pilár fundamentál ba nasaun”, tenik Pedro Klamar Fuik liuhosi Konferénsia Imprensa iha Palásiu Governu, kinta ne’e.

Dirijente ne’e iha esperansa bele transforma timoroan sira haknaar an iha nível foti desizaun.

“IDN nian esperansa  bele transforma timoroan hotu, liuliu líder Polísia no Funsaun Públika ne’ebé maka ba karreira foti desizaun ho hanoin estratéjiku”, nia akresenta.

Diretór ne’e refere liután, IDN la’ós atu profisionaliza de’it instituisaun F-FDTL no PNTL, maibé hakarak kapasita profisionál iha instituisaun Estadu hanesan funsionáriu públiku, nune’e sira bele hatene saida maka atu halo bainhira sira lidera instituisaun ne’ebé haknaar ba.

“Ita presiza profisionaliza sira atubele estabelese uluk hanoin estratéjiku, signifika katak ofisiál sira hotu ne’ebé maka tama iha kursu ida-ne’e bele komanda unidade idak-idak no ba funsionáriu Estadu sira iha instituisaun  atubele define polítika, halo planu ba dezenvolvimentu instituisaun rasik, no bele kumpre no komprende padraun ne’ebé utiliza atu enkuadra iha prosesu dezenvolvimetu nasional”, nia salienta.

Nune’e, komadante ne’e mós relasa liután, iha prosesu konstrusaun no konsolidasaun Estadu ne’e, institusaun hanesan seguransa no defeza presiza profisionaliza.

“Ita iha prosesu konstrusaun Estadu no konsolidasaun nasaun, institusaun hanesan Forsa Armada no Polísia Nasionál, inkluzivamente Funsaun Públika hanesan pilár fundamentál ba nasaun atubele profisionaliza no labele hola parte ativa iha vida politíka ne’ebé maka organizaun politíku partidáriu sira halo”, nia fundamenta.

IDN rasik durante ne’e fó ona formasaun kursu ba ema na’in-1.000 resin, kompostu hosi joven, universitáriu, funsionáriu públiku no líder komunitáriu sira, inklui membru superior F-FDTL no PNTL nian.

“Ami hetan ona pedidu hosi Ministériu Defeza rasik, atu bá-oin bele fó formasaun ne’e ba sira-nia desizaun politíku hotu tanba asuntu segurasa no defeza hanesan asuntu transversál ba ita hotu atubele responsabiliza ba soberania Estadu”, nia salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here