DILI, 20 fevereiru 2020 (TATOLI)–Atu hametin lasu amizade entre jornalista hosi mídia nasionál, Jornál Suara Timor Lorosa’e (STL) kontinua organiza eventu STL CUP, iha modalidade futeból ba jornalista sira durante  2020.

Koordenadór ba eventu STL Cup 2020, António Timoteo hateten, eventu ne’e atu selebra aniversáriu STL kada tinan no mós hametin liután relasaun amizade entre jornalista sira.

“Objetivu ami-nian harii ka loke eventu futeból ida-ne’e hodi halibur mídia sira hotu atu partisipa iha jogu ne’e hodi hametin liután relasaun amizade no komemora aniversáriu STL nian ba dala 27. Hosi jogu ida-ne’e atu hadi’a mós ita-nia saúde,” katak António ba TATOLI iha edifísiu STL, Surikmas, ohin.

Ekipa Jornál INDEPENDENTE no STL maka sei hahú joga uluk iha abertura STL CUP 2020 ne’ebé sei akontese iha loron 22 fulan-fevereiru iha kampu futébol Aimutin, Dili.

Nia relata ekipa hamutuk 11 maka sei partisipa iha eventu STL CUP hanesan Jornál Independente, TATOLI,IP, RTTL.ep, GMN, DIT, BNCTL, Timor Post, Dili Post, Telekomcel, RTM no STL.

Hosi ekipa 11 ne’e fahe ba team rua A no B. Team A kompostu hosi INDEPENDENTE, STL, Dili Post DIT ho RTM. Enkuantu team B, kompostu hosi GMN, BNCTL, Timor Post, DIT, TATOLI,IP ho RTTL,ep.

Ekipa sira ne’ebé sai vensedór ba eventu ne’e sei simu prémiu hanesan taxa.

“Prémiu ba ekipa ne’ebé sei simu taxa, segundu lugár taxa, terseiru lugár taxa. Ba mellór jogadór mós sei hetan taxa no mellór markadór hetan mós taxa,” hateten Koordenadór ne’e.

Entretantu, eventu STL CUP inisia kedas iha tinan 2018 to’o agora.

Kompaña Telkomcel, Mandiri no Pertamina maka sai patrosinadór ba eventu refere.

Jornalista: Hortencio Sanchez

Editór : Agapito dos Santos

HAKEREK NO HATÁN

Please enter your comment!
Please enter your name here