logo tipu arte marsiál PSHT, KORK no IKS Kera Sakti. Imajen/Repro

DILI, 20 fevereiru 2020 (TATOLI)—Vise-Xefe Bankada Parlamentár Congresso Nacional da Reconstrução de Timor (CNRT), Patrocínio Fernandes dos Reis, kongratula rezolusaun Governu nian ne’ebé reativa hikas atividade arte marsiál maibé husu Grupu Arte Marsiál sira atu hatudu sentidu responsabilidade ba nasaun.

“Ha’u hanoin atu garante ka la garante depende ba sidadaun hotu-hotu no komponente estadu nian inkluindu sira-ne’ebé maka halibur-aan iha Grupu Arte Marsiál ne’e ninia sentidu estadu no sira-nia sentidu responsabilidade nu’udar sidadaun, ne’ebé ke iha devér mós asegura estabilidade nasaun ida-ne’e,” dehan Patrocínio Fernandes dos Reis ba jornalista sira iha Parlamentu Nasionál, ohin.

Nia hatutan, grupu arte marsiál sira tenke asume mós responsabilidade nu’udar sidadaun ba estabilidade nasaun nian nune’e ema seluk ne’ebé la’ós Grupu Arte Marsiál iha direitu atu goza liberdade sirkulasaun ho livre.

Vise-Xefe Bankada CNRT ne’e hateten, lei ne’e la’ós rekursu úniku ida atu dehan depois iha lei ne’e bele garante maibé presiza parámetru atu sukat, liuliu regulamentu sira no tetu mós ema-nia komportamentu, liuliu sira-ne’ebé organiza-aan iha grupu arte-marsiál hodi hanoin katak sira mós asume responsabilidade ida.
Tuir nia, rezolusaun ne’e ninia vantajen no dezvantajen maibé presiza hanoin pozitiva ba kualkér inisiativa hosi estadu nian.

“Ita tenke hanoin pozitivu ba kualkér inisitiva hosi estadu hamosu ne’e, laiha estadu ida hanoin aat. Ba ha’u haree katak rezolusaun ne’e tempu naruk ida la’o ezijénsia hosi publiku ne’ebé ko’alia kona-ba atividade arte marsiál iha opiniaun kontroversiál. Balun dehan tenke reativa, balun dehan lae. Maibé, iha faze sira la’o mai ne’e Governu halo avaliasaun no obervasaun hodi haree ona,” nia hateten.

Nia konsidera rezolusaun horisehik ne’e faktu ida, hatudu katak Governu to’o iha pontu konkluzaun ida.

“Parese iha razaun para depois atu-bele reativa atividade arte marsiál sira-ne’e. Ha’u haree katak ne’e di’ak para hanoin katak Governu bele sériu liután no bele iha baze di’ak liután atu kontrola atividade sira-ne’e duké atividade sira-ne’e suspende maibé depois atividade sira-ne’e la’o hela,” nia dehan.

Nia argumenta, ho rezolusaun ne’e bele hanoin katak Governu bele iha forsa morál no forsa lejizlasaun ninian kontrola atividade sira-ne’e.

“Maibé ha’u atu hatete katak aleinde rezolusaun horisehik maibé lei numeru 5/2017 nian, ne’ebé ko’alia kona-ba arma-branka iha kapítulu ida regula atividade arte marsiál sira-ne’e. Maaibé, loloos lei ne’e regula ona atviidade sira-ne’e. Ne’ebé, rezolusaun horisehik ne’e inisiativa di’ak hosi Governu para depois atu halo kontrola di’ak liután atividade sira-ne’e,” nia informa.

Entretantu, Prezidente Komisaun B (=kaer Asuntu Negósiu Estranjeiru, Defeza no Seguransa), Adérito Hugo da Costa, seidauk bele fó komentáriu tanba nia parte seidauk asesu dokumentu hosi Governu kona-ba rezolusaun refere.

Notísia Relevante: KM Aprova Rezolusaun Reativa Arte-Marsiál

Jornalista : Evaristo Soares Martins

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here