Governadór BSTL, Abraão de Vasconcelos. Imajen TATOLI/Egas Cristovão

DILI, 20 fevereiru 2020 (TATOLI)–Banku Sentrál Timor-Leste (BCTL-sigla portugés) liuhosi ninia Governadór, Abrão de Vasconselos, informa hikas progresu dezenvolvimentu setór finanseira Timor-Leste ba Primeiru-Ministru (PM), Taur Matan Ruak.

“Primeiru-Ministru husu Banku Sentrál ko’alia uitoan kona-ba progresu balun ne’ebé iha tinan kotuk ha’u informa ona kona-ba dezenvolvimentu setór finanseira, liuliu inisiativa ne’ebé Banku Sentrál halo kona-ba modernizasaun ba ita-nia sistema pagamentu nasionál no oinsá kontribuisaun husi dezenvolvimentu ida-ne’e ba promosaun atividade Governu nian”, informa Governadór iha Palásiu Governu, kinta-ne’e.

Abrão refere liután, kona-ba sistema finanseira, agora kompara ho tinan haat liubá iha progresu di’ak tebes, liuliu servisu finanseira sira husi instituisaun finanseira sira seluk.

“Agora ita-nia sistema ne’e integradu ona, iha banku haat (BNCTL, BNU, MANDIRI no BRI) no sira-nia sistema integra únika ba P24. Ida-ne’e hanesan notisía di’ak ida karik públiku seidauk goza iha tempu badak, maibé tempu oinmai nia efeitu boot tebes atu fasilita ita-nia populasaun”, nia dehan.

Dirijente Banku-ne’e haktuir, durante enkontru, nia parte esplika mós ba Xefe Governu kona-ba tabelasaun ne’ebé halo husi Ministériu Finansa.

“Ha’u mós breafing uitoan Primeiru-Ministru, kona-ba diskusaun ne’ebé Banku Sentrál halo ho Ministra Finansa Interina, Sara Lobo Brites, kona-ba tabelasaun ne’ebé maka halo iha relasaun ho planu Ministériu Finansa nian kona-ba rekolla reseita ba iha fulan-marsu, tanba iha fulan ne’e kada tinan sempre hanesan fulan ida-ne’ebé maka kontribuinte sira tenke halo pagamentu. Entaun, Banku Sentrál foin lalais aselera prosesu atu fasilita kontribuinte sira bainhira selu taxa no la presiza ona ba banku, maibé hahú selu liuhosi Automated Teller Machine (ATM) no bele ba selu iha banku ne’ebé de’it”, subliña Governandór.

Biban ne’e, ekipa BCTL informa mós kona-ba sistema bankária iha Timor-Leste, relasiona ho kontribuisaun sira ne’ebé banku komersiál sira halo, liuliu iha situasaun ekonomia ne’ebé daudaun ne’e Timor-Leste enfrenta.

“Ha’u ho Primeiru-Ministru halo diskusaun uitoan kona-ba impaktu hosi situasaun ne’ebé Timor-Leste infrenta ein termu ekonómiku. Ami diskute mós kona-ba sistema finanseiru ne’ebé bele kontribui ajuda implementasaun programa Governu nian, liuliu programa sosiál sira ne’ebé maka afeta ba iha populasaun sira iha área rurál.  Ezemplu pagamentu ba idozu no veteranu”, nia dehan tan.

Nune’e, iha diskusaun ne’e Xefe Governu apresia servisu ne’ebé BCTL halo ona, inklui kolaborasaun ne’ebé BCTL halo ho Ministériu Finansa.

“Primeiru-Ministru apresia Banku Sentrál nia esforsu, liuliu kolabora ho Ministériu Finansa tanba ajuda tebes populasaun sira ne’ebé presiza asesu ho di’ak relasiona ho pagamentu ba idozu tanba ho sistema ne’ebé kria bele fasilita di’ak liután”, nia konklui.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here