Diretór Investigasaun Jeolojia Institutu Petróleu no Jeolojia, Elias da Silva Cabral. Imajen Tatoli/Florencio Miranda Ximenes

DILI, 20 fevereiru 2020 (TATOLI) – Diretór Investigativu Jeolojia, Insitutu Petroléu no Jeolojia (IPG-sigla portugés), Elias da Silva Cabral, hateten amostra peskiza ho módulu Amplified Geochemical Imaging (AGI) hamutuk 185, to’o ona iha sidade Newark, Delaware, Estadu Unidu Amérika (EUA).

“Ami akompaña husi online, ita nia amostra módulu AGI hamutuk 185 mak haruka to’o ona iha Amérika atu halo análiza iha laboratóriu Newark”, informa Diretór Elias Cabral ba Agência  TATOLI liuhosi rede sosiál, kinta ne’e.

IPG rasik haruka amostra ne’e, iha kuarta (12/02), liuhosi  transportasaun aériu husi Bali, Indonézia no kontinua Singapura to’o iha Amérika iha kuarta (18/02).

Jerente ne’e dehan, maski amostra ba peskiza mina no gás iha munisípiu Baucau no Viqueque ne’e to’o ona iha EUA, maibé seidauk simu informasaun ofisiál ruma husi parte laboratóriu.

“Ita hein de’it tanba to’o iha ne’ebá sira (parte laboratóriu) sei haree hotu ita nia amostra ne’e hafoin informa mai ita hodi hahú halo análiza,” nia akresenta.

Ho nune’e, nia garante katak amostra ba peskiza ne’e sei to’o ho susesu no kompletu atu parte laboratóriu bele halo análiza tuir loron ne’ebé determina ona.

Kona-ba kustu atu halo análiza, Diretór Elias realsa, daudaun ne’e sei iha negosiasaun ho laboratóriu Newark Delaware USA, katak ho osan $260.000 mak sei sosa ekipamentu módulu AGI, ne’ebé inklui ona ba prosesu análiza dadus iha laboratóriu ne’e.

Nia dehan tan, IPG hakarak rezultadu análiza ne’e hotu iha fulan-abríl atu iha fulan-maiu bele halo prosesamentu ba dadus, hafoin juñu bele ona haree rezultadu ba peskiza mina no gás.

“Ita haree karik rezultadu pozitivu, ami sei kontinua halo estudu kle’an ho métodu grau Jeofíziku atu hatene módulu mina ho kle’an inklui medida ba área ne’e”, nia akresenta.

Módulu AGI hahú kolleita iha 4 to’o 21 janeiru 2020, hanesan husi bloku A ne’ebé kompostu husi Postu Administrativu Venilale, Ossu-Viqueque, Vemasse ho totál módulu ne’ebé instala hamutuk 36.

Enkuantu bloku B kompostu husi Postu Administrativu Watulari, Quelicai, no Baucau, ekipa IPG instala módulu 73 no bloku C kompostu husi Laga no Baguia ho totál módulu 32, maibé iha módulu ida mak nehek estraga.

Atividade seluk ne’ebé maka ekipa halo mak instalasaun módulu ba posu abandonadu rua iha Alianbata ho módulu 22, posu Betano iha 22 ho kondisaun di’ak hotu.

Durante peskiza ba atividade iha terrenu, hahú husi prosesu instalasaun loron 21 no rekolla fali iha loron 21 ne’ebé ho totál kompletu loron 42.

Atividade peskiza ho ekipamentu AGI hahú instalasaun iha (13/1/2019) ho nia objetivu atu hatene ezisténsia idro-karbunetu iha rai okos, atividade kalibrasaun ba posu abandona no amostra mina no gás.

IPG halo peskiza ba mina no gás utiliza ekipamentu ka teknolojia modernu ho naran AGI hodi identifika ezisténsia mina no gás iha munisípiu Baucau no Viqueque. Ekipamentu AGI nu’udar teknolojia moderna ne’ebé utiliza ba esplorasaun jeokímika hodi identifika gás no mina, liuhosi migrasaun microseepage, indika ho kímika analítika husi C2 to’o C20 iha fatuk rezervatóriu.

Estudu ne’e nu’udar kontinuasaun ba estudu sistema petróleu ne’ebé hala’o iha área refere iha 2016 to’o 2017 no hatudu rezultadu ne’ebé di’ak ba konsentrasaun petróleu no gás.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here