Adjuntu Autoridade Munisípiu Dili, José Filipe Ximenes Smith.

DILI, 19 fevereiru 2020 (TATOLI)–Adjuntu Autoridade Prezidente Munisípiu Dili, José Filipe Ximenes Smith hateten, iha tempu badak Autoridade Munisípiu Dili sei haruka karta no hasai okupante sira ne’ebé mak hela iha eis ASPOL (asrama polisi) iha Ministériu Solidariedade Sosiál no Inkluzaun (MSSI) nia kotuk.

“Iha tempu badak, ita sei hasai okupante ne’ebé mak halo negósiu no hela iha área ASPOL, MSSI Caicoli nia kotuk ne’e. Ita hatene katak, okupante sira ne’e simu ona kompensasaun husi Governu iha 2009,” dehan José Filipe Ximenes Smith ba Ajénsia TATOLI hafoin ramata semináriu kona-ba Provokasaun Institusionál ba Programa Asaun Komunidade ba Saneamentu Ijíene (PAKSI) iha aula Xanana Sport Center, Bairru dos Grilhos, ohin.

Nia hatutan, atu hasai okupante hirak ne’e Autoridade Munisípiu Dili sei koopera hamutuk ho MSSI, Ministériu Obras Públika (MOP) nomós Polísia Nasionál Timor-Leste (PNTL) atu buka fatin no kria kondisaun ba okupante sira ne’e.

“Maibé, okupante sira ne’e sei la hetan kompensasaun no laiha tan razaun bainhira Governu deside halo mamuk fatin refere,” nia esplika.

Nia hateten, ba okupante sira ne’ebé mak halo ona uma-mutin ne’ebé metin iha fatin refere, lalika hanoin atu husu tan buat ruma ba Estadu tanba Estadu fó ona kompensasaun ba sira iha 2009 liu ba ne’e.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here