Sekretáriu Estadu ba Asuntu Kombatente Libertasaun Nasionál, Gil da Costa Monteiro 'Oan Soru'. Imajen António Gonçalves

DILI, 18 fevereiru 2020 (TATOLI)—Sekretáriu Estadu no Ministru Interinu ba Asuntu Kombatente Libertasaun Nasionál, Gil “Oan Soru” da Costa informa, komemorasaun Loron Nasionál Veteranu ne’ebé monu iha 3 marsu 2020 ne’e, sei foti tema prinsipál “Relembra Pasadu, Reafirma Prezente no Projeta Futuru”.

“Ami foti tema importante ida ne’e, atu haree ba ita-nia memória pasada hahú husi 1974 mai to’o 1999, hodi relembra ita-nia pasadu, reafirma ita-nia prezente no projeta ita-nia futuru. Tanba, ita la relembra ita-nia pasadu, ohin, ita lahatene ita iha ne’ebé. Ita mós la hatene bainhira mak ita atu bá no bá iha ne’ebé ita la hatene,” dehan Gil “Oan Soru” da Costa ba jornalista sira hafoin halo soru-mutuk ho Prezidente Repúblika, Francisco “Lú Olo” Guterres iha Palásiu Prezidente Nicolau Lobato, Bairru-Pité, Dili, ohin.

Ho tema ida-ne’e, nia hatutan, Prezidente Komisaun Organizadora (KO) hamutuk ho konselleiru sira hakarak atualiza preparasaun sira no konvida Xefe Estadu atu partisipa iha serimónia refere.

“Ami mai iha-ne’e, halo enkontru ho Prezidente Repúblika, kompostu husi Prezidente Komisaun Organizadora ba serimónia 3 marsu mak hanesan Virgílio Smith, konselleiru sira hanesan David “mandate” Dias Ximenes, Vidal “Riak Leman” de Jesus no ha’u rasik. Ami mai buka hatene mós pensamentu balun husi Prezidente Repúblika,” Oan Soru informa.

Liuhosi enkontru ida-ne’e, nia haktuir, iha posibilidade Prezidente Repúblika sei partisipa nu’udar veteranu ida iha komemorasaun loron nasionál veteranu nian ne’ebé sei realiza iha 3 marsu, iha fulan oin mai.

Veteranu ne’e mós haklaken, maski atividade laduun barak tanba situasaun polítika atuál maibé serimónia sei hahú iha loron 1-3 fulan marsu [2020] ne’ebé sei envolve veteranu sira ne’ebé mai husi kada munisípiu ho ninia reprezentante kada munisípiu ema na’in-20.

Entretantu, iha Komemorasaun Loron Nasionál Veteranu 3 marsu 2019 ne’ebé realiza iha Palásiu Governu, iha ninia deskursu, Prezidente Repúblika Francisco “Lú Olo” Guterres hateten tuir lei Timor-Leste nian, liafuan “Veteranu” ne’e refere de’it ba sira ne’ebé partisipa iha luta libertasaun nasionál, pelumenus tinan sanulu-resin lima, liuhosi estrutura ka organizasaun rezisténsia ruma, entre 20 agostu 1975 no 25 outubru 1999.

Iha lei númeru 3/2016 haktuir, iha serimónia komemorasaun 3 marsu 2019, Estadu presta omenajen ba sidadaun timoroan hotu ne’ebé partisipa iha Frente Armada, Frente Klandestina no Frente Diplomátika ka esterna, iha luta hasoru okupasaun indonézia.

Notísia Relevante: Oan Soru: “Ko’a Osan Veteranu Hanesan Polítika ba Sira nia Futuru”

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here