Doutora Amita nebe fila na ba aman maromak tuir tradisaun relijiaun Hindu nian hodi sunu mate isin iha usleu hera. Imajen/Felicidade Ximenes

DILI, 19 fevereiru 2020 (TATOLI)-Mate-isin antiga médika Ospitál Nasionál Guído Valadares (HNGV-sigla portugés), Amita Thampa hosi Nasaun Nepál, kuarta ne’e, família halo ona kremasaun (sunu) iha área Usleo, Hera, Munisípiu Dili, tuir fiar Hindu nian.

Tuir Xefe Komunidade Hindu iha Timor-Leste, Ketut Budiadnya, hateten antes halo kremasaun sei hamulak no tau aifunan tuir relijiaun Hindu.

Notísia Relevante :Médika Amita Thampa Hakotu Iis Tanba Moras Pulmaun

“Mate isin hatún iha carro funeráriu hodi hulan mate isin lori ba tasi tuir tradisaun Hindu nian,” katak Ketut Budiadnya ba jornalista durante serimónia kremasaun iha Hera.

Depois hamulak, oan na’in-tolu hosi matebian sei kuru tasi-been ho sanan rai, no tutur iha ulun hodi akompaña isin mate antiga médika ne’e to’o iha ai-maran ne’ebé butuk atu sunu mate isin.

“Hosi ne’e oan na’in-tolu husi Doutora Amita tutur sanan rai hale’u mate-isin dala tolu tuir tradisaun Hindu, depois maka sira sunu,” Ketut haktuir.

“Prosesu sunu mate-isin ne’e to’o oras tolu ka lima tanba uza manuál. Se uza komfro ka mákina ne’e bele oras ida deit,” nia esklarese liután.

Hafoin sunu hotu mate-isin, família ra’ut hikas ahuk-desan balun husik ba tasi no balun tenke falun hodi lori fila ba matebian nia nasaun orijén Nepál.

“Liutiha loron 12 família halo hikas orasaun tuir kultura Hindu nian,” nia hatutan.

Mate-isin matebian nian sai hosi ninia rezidénsia Praia dos Coqueiros, Dili kuarta ne’e, iha tuku  8:30 otl no to’o iha fatin serimónia kremasaun Hera iha tuku 9:40 otl.

Entretantu, Diretór Ezekutivu HNGV, Aniceto Barreto, Diretór Nasionál Saúde Públika, Pedro Canísio, Diretora SAMES, Odete Maria Freitas Belo, Família Hindu iha Timor-Leste no Profisionál Saúde inklui estudante Institutu Siénsia Saúde (ICS) no Estudante Medisina UNTL maka partisipa iha serimónia kremasaun ka sunu mate-isin iha Hera.

Jornalista : Felicidade Ximenes

Editór      : Agapito dos Santos

HAKEREK NO HATÁN

Please enter your comment!
Please enter your name here