Xefe Estadu Maior Jenerál FALINTIL-Forsa Defeza Timor-Leste, Majór Jenerál Lere Anan Timur. Imajen/Antonio Goncalves.

DILI, 19 fevereiru 2020 (TATOLI)–Xefe Estadu Maior FALINTIL Forsa Defeza Timor Leste (F-FDTL), Majór Jenerál Lere Anan Timur, apela ba juventude no povu Timor-Leste atu labele hakerek lemo-lemo líder istóriku  sira-nia naran iha didin-lolon sira iha luron ninin.

“Ema ne’ebé hakerek lemo-lemo lider sira-nia naran ne’e ho intensaun la di’ak tanba hakerek ho intensaun polítika. Di’ak liu para ona tanba ha’u haree ema ne’e, ba hakerek to’o iha ha’u-nia moru Kuartél iha Fatuhada ne’ebá. Sira tenke responsabiliza. Lider sira ne’e mak pioneiru libertasaun ba independénsia Timor-Leste nian,” Lere apela, hafoin hasoru malu ho Prezidente Repúblika (PR) iha Palásiu Prezidensiál, Bairru-Pité, Dili, ohin.

Nia informa, durante enkontru ho Xefe Estadu sira ko’alia mós kona-ba asuntu hakerek lider sira-nia naran iha didin-lolon sira no ida ne’e konsidera hanesan ajitasaun ida tanba ema hakarak hamanas situasaun.

“Hanesan uluk ha’u hateten ona katak, grupu kiik ida ka rua, sempre hakarak instabiliza ita-nia soberanía, ita-nia estadu, ho ita-nia independénsia ida ne’e. Maibé, ha’u hanoin kata ita-nia Polisía Nasionál Timor-Leste ho F-FDTL, matan mós nafatin, hodi buka tuir sé maka halo buat sira ne’e. Antes ne’e ema la hakerek, situasaun polítika manas hanesan ne’e maka derepente Xanana ninia naran mosu lemo-lemo iha fatin hotu,” nia haktuir.

Tanba ne’e, nia apela ba públiku, ba joven no povu Timor tomak katak naran Xanana ne’e la’ós foin mak mosu maibé ne’e rekoñesidu internasionalmente no nasionalmente.

“Uluk, 1975, kuandu funu mosu ne’e, Xanana mosu tiha ona. Tanba ne’e, Xanana Gusmão, Ramos Horta, Marí Alkatiri, sira ne’e líder istóriku, líder sira ne’ebé mak komanda ita-nia funu. Tanba ne’e, lalika hakerek sira-nia naran iha estrada no ema koñese tiha ona sira,” nia apela.

Notísia Relevante: PNTL Identifika Ona Autór Hakerek Naran Xanana iha Parede

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here