Xefe Departamentu Finansa PNTL, Inspetora Fátima Mendonça. Imajen/Eugénio Pereira

DILI, 19 fevereiru 2020 (TATOLI) – Komandu Polísia Nasionál Timor-Leste (PNTL), liuhosi Komandante Jerál, Komisáriu Faustino da Costa, ohin, iha Kuartél Jerál  PNTL, Caicoli, Dili, fó pose ba Inspetora Fátima Mendonça hodi asume kargu Xefe Departamentu Finansa  PNTL.

Notísia Relevante : Superintendente Na’in-hitu Prenxe Rekizitu ba Vaga Hitu iha Komandu PNTL

Nomeasaun ne’e fundamenta ho despaixu númeru 106-A/CG-PNTL/II/2020 hodi troka Xefe Departamentu Finansa PNTL, Superintendente Asistente Basílio de Jesus.

Komandante Operasaun Nasionál PNTL, Superintendente Xefe Pedro Belo.

Komandante Operasaun Nasionál PNTL, Superintendente Xefe Pedro Belo dehan, nomeasaun Xefe Departamentu PNTL Finansa foun urjénsia no importante hodi jere programa orsamentu PNTL nian.

Iha parte seluk, Pedro Belo dehan, serimónia fó pose ba Komandante foun Unidade Polísia Marítima (UPM) sei hala’o iha semana ne’e.

“Ha’u hanoin tempu besik ita-nia Komandante Jerál sei fó pose mós ba Komandante UPM foun tanba komandante sei haree sé maka atu asume kargu ne’e,” dehan Pedro Belo.

Iha fatin hanesan, Enposadu Inspetora Fátima Mendonça hato’o agradese ba Aman Maromak no konfiansa husi Komandu PNTL hodi fó fiar ba nia lidera knaar foun Zefe Departamentu Finansa PNTL.

Nia parte sei koopera ho komandante sira hotu hodi hadi’a programa no planu orsamentu PNTL nian tuir nia natureza no nesesidade.

Inspetora Fátima dehan, mezmu agora daudaun Komandu PNTL uza hela Dotasaun Orsamentu Temporáriu (DOT), maibé nia parte iha konfiansa tanba iha esperiénsia hodi jere planu no programa bele la’o di’ak hodi fó susesu ba Instituisaun PNTL.

Antes ne’e, Inspetór Fátima servisu nu’udar Xefe Tezoureira PNTL durante tinan-tolu ne’ebé iha esperiénsia kle’an kona-ba jornada orsamentu iha instituisaun PNTL.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here