Prezidente Parlamentu Nasionál (PPN), Arão Noé de Jesus. Imajen/Xisto Freitas

DILI, 19 fevereiru 2020 (TATOLI)–Prezidente Parlamentu Nasionál (PPN), Arão Noé de Jesus da Costa Amaral, hateten Parlamentu Nasionál kontinua funsiona ho di’ak hafoin rejeisaun Orsamentu Jerál Estadu 2020 iha fulan-janeiru tinan ne’e.

Prezidente PN, Arão Noé, atualiza situasaun ne’e ba Prezidente Repúblika (PR), Francisco “Lú Olo” Guterres, liuhusi enkontru mensál ne’ebé hala’o iha Palásiu Prezidente Nicolau Lobato.

“Ha’u mai relata de’it knaar no lala’ok Parlamentu Nasionál nian, ne’ebé durante ne’e la’o, ho situasaun hafoin PN la aprova Orsamentu Jerál Estadu (OJE) 2020 nian, atividade Parlamentu nian la’o normál nafatin,” Arão Noe ba jornalista sira iha Palásiu Prezidente Nicolau Lobato, Bairru-Pite, Dili, ohin.

Tuir nia, plenária Parlamentár nafatin hala’o iha segunda no tersa, kuarta ho kinta atividade Komisaun sira la’o nafatin, audiénsia no fiskalizasaun mós la’o nafatin. Ne’e hatudu katak PN kontinua funsiona to’o agora tuir oráriu ne’ebé iha.

Oinsá ho apresiasaun husi Prezidente Repúblika, Prezidente Parlamentu Nasionál hatán, Prezidente Repúblika apresia tanba maski iha diverjénsia polítika ne’ebé iha maibé Parlamentu Nasionál hanesan segundu órgaun soberania, funsiona nafatin ho di’ak.

“Prezidente Repúblika husu nafatin atu deputadu sira hotu-hotu bele kontribui, mantein, hodi ita estabiliza fali situasaun polítika ne’ebé agora daudaun la’o,” nia hateten.

Antes ne’e, Xefe Estadu Francisco “Lú Olo” Guterres kompromete atu nafatin hala’o diálogu hodi rona hanoin husi líder no sidadaun sira liuliu órgaun konsulta-Konsellu Estadu, hodi foti desizaun relasiona ho situasaun polítika-konstitusionál ne’ebé oras ne’e nasaun hasoru, atu ema hotu hamutuk lori polítika no dezenvolvimentu ba povu tomak nia moris-di’ak no justisa sosiál.

Notísia Relevante: Proposta OJE 2020 La Pasa

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here