Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu. Kuarta (19/02/2020). Imajen/TATOLI Egas Cristovao.

DILI, 19 fevereiru 2020 (TATOLI)–Ministru Administrasaun Estatál ein ezersísiu, Abílio José Caetano, aprezenta Projetu Rezolusaun Governu, ba nomeasaun Administradora Manufahi foun, Filomena da Costa Nunes hodi troka Administradór tuan, Saudozu Carlito Pinheiro.

“Ministru Administrasaun Estatal ein ezersísiu aprezenta Projetu Rezolusaun Governu, ne’ebé hetan ona aprovasaun iha Konsellu Ministru, kona-ba nomeasaun Filomena da Costa Nunes ba kargu Administradora foun iha Munisípiu Manufahi, hodi prenxe kargu ne’ebé mamuk husi fulan-outubru 2018”, informa Ministru Reforma Lejizlativa Asuntu Parlamentár, Fidelis Manuel Leite Magalhães iha Palásiu Governu, kuarta ne’e.

Iha tinan-2018 liubá, Saudozu Carlito Pinheiro lakon vida, inklui nia família, tanba hetan asidente tráfegu iha dalan husi Manufahi ba Dili hodi partisipa enkontru iha Ministériu Administrasaun Estatál (MAE).

Aleinde ne’e, ezekutivu sira aprova mós Proposta Rezolusaun Governu husi Ministériu Turizmu, Komérsiu no Indústria, hodi nomea Alexandre Pires, hanesan Prezidente Konsellu Administrasaun no Alves Gomes Martins no Cecília da Fonseca, hanesan vogál ba Konsellu Administrasaun Institutu Kualidade Timor-Leste, Institutu Públiku.

Governu mós nomea Carlito Gama no José Gonçalves ba Konsellu Fiskál iha institutu ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here