Diretora Jerál EDTL, Arlinda Miranda Manetelo. Imajen/Florencio Miranda Ximenes

DILI, 19 fevereiru 2020 (TATOLI) – Atu kontribui reseita ba kofre estadu liuhosi servisu fornesimentu elétrika, Eletrisidade Nasionál Timor-Leste (EDTL) liuhosi ninia dirijente husu ba kliente sira ho konsiénsia atu hapara dada ahi-ilegál.

“Ita kontinua husu nafatin konsiénsia ba kada kliente atu sai hanesan sidadaun ne’ebé di’ak hodi kontribui ba reseita liuhosi dalan sosa pré-pagu, nune’e ita bele ajuda orsamentu ne’ebé ita gasta barak liu ba kombustível maibé la ekilíbriu ho reseita”, tenik Diretora Jerál EDTL, Arlinda Miranda Manetelo ba Agência TATOLI iha ninia knaar fatin, Caicoli, kuarta ne’e.

Maski nune’e, nia rekoñese daudaun ne’e klinte barak mak kontribui ona reseita ba kofre estadu liuhosi sosa pré-pagu.

Nia refere tan, normalmente iha nasaun ne’ebé de’it kuandu uza sistema jeradór gazoél, ninia kustu ba manutensaun no operasaun kombustível ne’e sei presiza osan boot liu kompara ho reseita.

Tuir Arlinda Miranda, problema loloos ba gastu barak liu kompara ho reseita tanba jeradór sira iha sentrál elétrika Hera no Betano uza gazoél ne’ebé hahú husi produsaun, liña transmisaun no distribuisaun ne’e karun.

“Ita nia gastu boot liu kompara ho ita-nia reseita, tanba ne’e ita presiza esforsu atu redús, liuliu konsiénsia sidadaun nia atu kontribui”, nia akresenta.

Ho nune’e, daudaun ne’e ekipa EDTL hahú halo ona inspensaun ba kliente sira iha kapitál Dili no munisípiu sira hodi tesi kotu ligasaun bainhira deteta ema dada ahi-ilegál.

“Iha tinan kotuk ami deteta ligasaun ilegál kuaze 500 resin no haruka sira selu multa”, nia.

Iha tinan kotuk, EDTL mós iha ona kontadór hamutuk 11.000 hodi monta ba uma-kain sira, enkuantu iha tinan ne’e iha planu atu sosa tan kontadór 30.000 maibé seidauk konsege realiza tanba orsamentu la pasa iha Parlamentu Nasionál.

MOP Iha Planu Uza Enerjia Renovável

Antes ne’e, Governu liuhosi Ministériu Obra Públika (MOP) iha planu atu buka enerjia renovável ne’ebé mai husi solár painél, bee no anin ba sentrál elétrika rua atu hamenus kustu ba manutensaun no kombustível.

Ba inisiativa ida-ne’e, kompañia WARTSILA aprezenta ona estudu pré-viabilidade ba MOP kona-ba sistema kombustível iha sentrál elétrika Hera, atu la’ós uza de’it gazoél, maibé uza mós gás hodi prodús enerjia.

Ho sistema foun ne’e, bele halo poupansa ba kustu orsamentu ho porsentu 40 to’o 50 husi orsamentu ba manutensaun no kombustível ne’ebé kada tinan Governu sosa.

Kada tinan Governu aloka osan millaun $10 ba manutensaun sentrál elétrika Hera no Betano no ba akizisaun kombustível kada tinan Governu prevee iha Orsamentu Jerál Estadu (OJE) millaun $102 atu sosa mina litru millaun 150.

Iha tinan-2019, EDTL konsege rekolla de’it reseita millaun $34, ne’ebé ki’ik liu kompara ho kustu kombustível milliaun $100 resin.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here