Diretor ezekutivu PRADET Manuel dos Santos Kaer liman ho Diretur Eksekutivu CNC, Hugo Fernandes hafoin asina nota entendimentu hodi tulun sobrevivente sira ne'ebé durante ne'e sofre iha prosesu luta libertasaun.Imajen/Hortencio Sances

DILI, 19 fevereiru 2020 (TATOLI)–Centro Nacional Chega (CNC), kuarta ohin, estabelese memorandu entendimentu (MoU-sigla inglés) ida ho organizasaun PRADET Timor-Leste hodi fó asisténsia ba sobrevivente sira ne’ebé maka dadaun ne’e sofre hela moras mentál.

MoU ne’e atu oinsá CNC fó apoiu tékniku no finanseiru ba PRADET hodi fó asisténsia ba Sobrevivente sira ne’ebé ho problema mentál.

Diretór Ezekutivu CNC, Hugo Maria Fernades, hateten objetivu hosi kooperasaun ne’e hodi ezekuta programa Governu nian maka fó hela knaar ba CNC oinsá fó asisténsia ba sobrevivente moras mentál sira.

“Ita hotu hatene, sobrevivente sira vítima hosi ita-nia funu ida-ne’e kontinua moris iha kondisaun oioin de’it hanesan kondisaun saúde mentál ne’ebé seidauk saudável. Entaun, sira-nia saúde presiza halo tratamentu ne’e mak ohin CNC asina nota entendimentu ne’e,” katak Hugo ba jornalista iha salaun konferénsia CNC, Balide.

Iha tinan 2019, CNC hamutuk ho parseiru hanesan FOKUPERS, Asosiasaun HAK, AJAR, Cruz Vermella Timor-Leste (CVTL), Ministériu Solidaridade Sosiál no Inkluzaun (MSSI), Ministériu Saúde, PDHJ no seluk tan implementa ona meiu ne’ebé di’ak hodi fó asisténsia ba sobrevivente sira.

“Iha diskusaun naruk ami ho grupu sira konsege harii polítika ida hanaran hakbiit sobrevivente vulnerável. Iha polítika nia laran mak ita iha kategoria apoiu ne’e tolu. Ida mak haree vítima sira moris iha saúde mentál. Ida seluk, sira ne’ebé presiza tratamentu saúde fíziku. Ida ikus mak sira ne’ebé presiza hakbiit ekonomikamente iha sira-nia moris,” nia esplika.

Hugo fiar katak PRADET bele implementa MoU ne’e ho di’ak tanba organizasaun iha ona kapasidade rekursu umanu hodi fó tratamentu terapia ba sobrevivente sira.

Iha biban hanesan, Diretór Ezekutivu PRADET, Manuel dos Santos hateten memorandu entendimentu ho CNC ne’e faze dahuluk tanba ne’e sei esforsu hodi implementa programa ne’e ho di’ak liután.

“Asina nota ne’e ami foin dahuluk ho instituisaun Governu no ami agradese tebes ba CNC tanba bele fó konfiansa mai ami atu halo servisu apoiu tékniku nune’e bele tulun ita-nia maluk sobrevivente sira liuliu iha moras mentál nian,” dehan Manuel.

Jornalista: Hortencio Sanchez

Editór      : Agapito dos Santos

HAKEREK NO HATÁN

Please enter your comment!
Please enter your name here