Eis Defenfór Públiku, Sergio Hornai

DILI, 18 fevereiru 2020 (TATOLI)—Komisáriu Komisaun Antí Korrupsaun (CAC-sigla portugés), Sérgio Hornai, infroma Prezidente Repúblika (PR), Francisco Guterres “Lú Olo”, sei partisipa no halo abertura ba Konferénsia Nasionál ne’ebé realiza husi Komisaun Antí Korrupsaun ho tema “Kombate Korrupsaun Timor-Leste iha Ne’ebé Ona no Atu Bá Ne’ebé, Iha Tinan 10 Mai”.

Nia informa, hafoin hamutuk ho Komisáriu Adjuntu na’in-rua, Augusto Castro no Luís de Oliveira Sampaio hala’o soru-mutuk ho Prezidente Repúblika hodi konvida Xefe Estadu, Francisco Guterres Lú Olo, ofisialmente CAC konvida PR atubele halo abertura ba konferénsia nasionál ne’ebé tuir planu sei realiza iha Salaun Kay Rala Xanana Ministériu Finansa, Aitarak Laran, Dili, iha loron 24-25 fevereiru 2020, hodi komemora tinan 10 ezisténsia KAK nian.

“Pozitivu tebe-tebes tanba Prezidente Repúblika komprometidu no deklara ofisialmente iha reuniaun ne’e, katak sei marka prezensa no halo mós abertura ba konferénsia nasionál ne’e,” dehan Sérgio Hornai ba jornalista sira hafoin halo soru-mutuk ho Prezidente Repúblika iha Palásiu Prezidente Nicolau Lobato, Bairru-Pité, Dili, ohin.

Iha konferénsia nasionál refere, nia informa, Prezidente Repúblika sei hato’o ninia alokasaun ho tema “Perspetiva Politica Nacional para Prevenir e Combater a Corrupcao nos Proximos 10 Anos”.

Nia esplika, pontu importante balun ne’ebé mak sei elabora iha loron primeiru mak kona-ba afirmasaun polítika mai husi órgaun soberania Estadu ninian, oinsá mak bele hametin Estadu Direitu Demokrátika. Liuliu, nia dehan, iha kontestu matéria espesiál ba iha Kombate Kriminalidade, Kombate Korrupsaun no mós krime koneksu sira iha rai-laran.

“Ita hotu hatene katak krime korrupsaun nu’udár matéria ida-ne’ebé kompleksu no transnasionál ne’ebé laiha fronteira. Entaun, ita hanesan Estadu, ita presiza haree mós ida-ne’e. Alende ida-ne’e, ita mós hakarak fó hanoin oinsá bele hametin dezenvolvimentu instutusionál iha ita-nia rain, liuliu haree ita-nia kapasidade institusionál entermu koordenasaun,” nia dehan.

Atu kombate krime korrupsaun, nia esplika, oinsá bele haree Timor-Leste nia ordenamentu jurídiku sira, hanesan Estadu, haree ba leí sira ka instrumentu nasionál sira ne’ebé iha no oinsá halo artikulasaun.

Nia haktuir, Timor-Leste bele halo komplementaridade ba iha ordenamentu jurídiku sira hodi bele hametin liután Timor-Leste nia instituisaun no finalmente bele fó prestasaun serbisu ida ne’ebé di’ak ba komunidade.

Nia informa, oradór prinsipál sira seluk mak hanesan Prezidente Parlamentu Nasionál, Arão Noé Amaral, lori tema “Politica Legislativa Anti Corrupcao para Modernizar o Quadro Legal de Timor-Leste nos proximos 10 anos”, Prezidente Tribunal Rekursu Deolindo dos Santos aprezenta tema “O Papel dos Tribunais para Implementacão da Justiça Eficiente, Efetivo nos Crimes de Corrupcao”.

Entretantu, nia haktuir, Primeiru-Ministru, Taur Matan Ruak (TMR) sei lori tópiku “Politica do VIII Governo Constitucional, sobre a Prevencão a Criminalizacão a Corrupcão para Reforcar a Boa-Governacao e Justiça em Timor-Leste nos Proximos 10 anos” no Prokuradór Jerál Repúblika, José Ximenes sei aprezenta tema “O Ministério Público no Exercício da Acão Penal para o Combate a Corrupcão”.

Aleinde ne’e, nia infroma, ministru balun ne’ebé tama iha lista atu sai konvidadu Verry Important Person (VIP) mak hanesan Ministru Reforma Legizlativa no Asuntu Parlamentár (MRLAP), Ministru Negósiu Estranjeiru no Kooperasaun (MNEK), Ministru Justisa (MJ), Prezidente Autoridade Rejiaun Administrativa Espesiál Oé-Cusse Ambeno (RAEOA) no servidór públiku seniór sira.

Kona-ba konvidadu seluk, tuir nia, sei konvida mós setór privadu sira, konfisaun relijioza sira, prezidente autoridade munisípiu sira, serbisu-na’in Fórum Organizasaun Naun Governamentál Timor-Leste (FONGTIL) no servisu profisionál mídia sira.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here