Representante da Santa Se Monssenhor, Marco Sprizzy Dadalia Eis Primeiru-Ministru no Atual Xefe Negosiadór ba Asuntu Fronteira Marítima no Terestre, Kay Rala Xanana Gusmão, Gusmão. Imajen Tatoli/ Egas Cristovao

DILI, 18 fevereiru 2020 (TATOLI)—Reprezentante Vatikanu Núnsiu Apostóliku iha Timor-Leste, Arsebispu Mgr. Joseph Marino liuhusi ninia Vise Mgr. Marco Sprizzi, ohin, hasoru malu ho Eis Prezidente Repúblika, Kay Rala Xanana Gusmão, hodi ko’alia kona-ba lala’ok dioseze sira-nian no Xanana husu ba Vatikanu atu reza ba povu Timor-Leste.

“Ohin, ami ko’alia, núnsiu husu ba ha’u karik iha buat ruma husu ba vatikanu, bele dehan. Ha’u hatán: ‘Loos! Ami husu ba vatikanu para reza mai ami timoroan sira hotu no ba povu Timor-Leste,” dehan Xanana Gusmão ba jornalista sira hafoin ramata sorumutu ho Reprezentante Vatikanu Núnsiu Apostóliku iha Timor-Leste, Arsebispu Mgr. Joseph Marino liuhosi ninia Vise Mgr. Marco Sprizzi, iha Sede CNRT, Bairru dos Grilhos, Dili, tersa (18/2/2020)

Xanana hatutan, enkontru ka sorumutu entre reprezentante Vatikanu iha Timor-Leste ne’e konsidera enkontru hanesan belun ho belun.

“Enkontru ida ne’e ita bele dehan enkontru hanesan belun ho belun ka enkontru entre reprezentante Vatikanu ho Timor-Leste ka ho sarani sira,” nia hateten.

Iha enkontru refere, Xanana Gusmão ho núnsiu mós ko’alia kona-ba planu Amu Papa Francisco nia vizita mai iha Timor-Leste iha tinan 2021 maibé amu papa nia vizita ne’e seidauk klaru.

“Ezatamente, lae. Reprezentante Vatikanu iha ne’e husu bainhira mak Amu Papa mai maibé seidauk hatene loloos. Ne’ebé, karik iha momentu ruma ne’ebé hatene ona katak atu mai karik depois husi núnsiu sei fó hatene,” nia haktuir.

Entretantu, reprezentante vatikanu iha Timor-Leste, Marco Sprizzi hateten, nia sempre dehan ba jornalista sira kona-ba iha posibilidade Santo Papa Francisco mai vizita Timor- leste maibé seidauk iha komunikasaun ofisiál husi vatikanu.

“Ha’u sempre dehan ba jornalista sira katak ami iha optimista bo’ot tebes iha posibilidade Santo Papa Francisco vizita Timor-Leste. Ne’ebé, husu ita hotu reza hodi nune’e Papa bele mai vizita Timor. Maibé, ha’u seidauk iha komunikasaun ofisiál ruma husi Vatikanu,” dehan Marco Sprizzi.

Aleinde ne’e, atuál Prezidente Partidu CNRT, Xanana Gusmão haktuir, iha sorumutu ida-ne’e nia ho núnsiu ko’alia kona-ba lala’ok dioseze sira-nian no ko’alia mós kona-ba kongregasaun madre sira-nian ne’ebé tulun serbisu iha klínika sira iha Timor-Leste.

“Núnsiu iha ne’e tinan ida liu tiha ona, ami nunka hasoru malu. Entaun, ohin, núnsiu mai ho kontente hasoru ho ha’u hodi ko’alia kona-ba oinsá mak lala’ok iha dioseze sira-nian. Liuliu, ami temi mak kongregasaun husi madre sira ne’ebé durante ne’e ajuda iha klínika no iha fatin-fatin,” nia dehan.

Jornalista : Osoria Marques

Editór       : Cancio Ximenes

HAKEREK NO HATÁN

Please enter your comment!
Please enter your name here