Prezidente Tribunál Rekursu, Deolindo dos Santos. Imajen/Xisto Freitas

DILI, 17 fevreiru 2020 (TATOLI)—Prezidente Tribunál Rekursu, Deolindo dos Santos, lakohi atu fó komentáriu antesipadamente kona-ba perspetiva jurídika ba diverjénsia polítika husi VIII Governu ne’ebé forma husi koligasaun Aliansa Mudansa ba Progresu (AMP) tanba sei hein rezultadu diálogu husi Xefe Estadu, Francisco Guterres “Lú Olo” ho polítiku sira.

“Diskusaun ne’ebé oras ne’e la’o hela, liga ho kestaun legál balun maibé iha kestaun polítika barak liu iha laran. Entaun, ha’u nu’udár Prezidente Tribunál Rekursu ne’ebé mak asume hela kompeténsia supremu Tribunál ninian, ha’u labele emite ha’u-nia opiniaun antesipadamente kona-ba kestaun ida-ne’e. Ha’u hein katak, abordájen ne’ebé mak Prezidente Repúblika halo ho polítiku-na’in sira, sei to’o iha konkluzaun ruma,” dehan Deolindo dos Santos hafoin hala’o enkontru mensál ho Prezidente Repúblika, iha Palásiu Prezidente Nicolau Lobato, Bairru-Pité, Dili, ohin.

Maski, nia hatutan, sei iha opiniaun legál balun husi nia maibé nia sempre rezerva nafatin katak nia labele emite iha situasaun polítika atuál daudaun ne’e. Nia dehan, nia rasik no povu tomak Timor-Leste tenke hein bainhira mak solusaun ne’e mosu mai.

Nia rekoñese, nia hatene ho didi’ak situasaun polítika atuál agora ne’ebé iha ninia faktu sira no solusaun ho baze legál. Maibé, nia hateten, nia lakohi atu fó uluk komentáriu molok Prezidente Repúblika konklui diálogu ho líder polítiku sira.

Notísia Relevante: Xefe Estadu Enkoraja Tribunál Labele Influensiadu

“Maski ha’u hatene tiha ona buat balun ne’ebé maka iha ninia faktu no solusaun hanesan ne’e maibé en prinsípiu ha’u labele emite ha’u-ninia opiniaun antesipadamente. Tribunál sei hateten buat balun bainhira iha ona konkluzaun husi debate ne’e,” nia promete.

Entretantu, hafoin rejeisaun Proposta Lei Orsamentu Jerál Estadu (OJE) 2020, iha 17 janeiru 2020, Prezidente Repúblika uza ninia kompeténsia husi artigu 74 Konstituisaun RDTL atu garante unidade Estadu no funsionamentu regulár instituisaun demokrátika, liuhosi konvoka diálogu ho líder polítiku no entidade relevante sira inklui líder istóriku no personalidade sira, hodi rona sira-nia hanoin kona-ba situasaun polítika-konstitusionál rai-laran.

Antes ne’e, Prezidente Repúblika hateten hamutuk ho líder no personalidade hirak-ne’e, Xefe Estadu sei halo análize no identifika opsaun sira ne’ebé di’akliu hodi hadi’a situasaun polítika-konstitusionál atuál.

Xefe Estadu mós sei rona hodi tetu hanoin sira hosi ninia órgaun konsulta-Konsellu Estadu, molok foti dezisaun relasiona ho situasaun polítika-konstitusionál ne’ebé oras ne’e nasaun enfrenta.

Notísia Relevante: Prezidente Repúblika Sei Hahú Ronda Diálogu iha 23 Janeiru

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here