Bee Manas Marobo.Imajen/ TATOLI

DILI, 18 fevereiru 2020 (TATOLI) – Ministériu Turizmu, Komérsiu no Indústria (MTKI) iha tempu badak sei simu termu entrega husi Sekretaria Estadu Formasaun Profisionál no Empregu (SEFOPE) atu jere Bee Manas Marobo iha Suku llat-Laun, Postu Administrativu Bobonaro, Munisípiu Bobonaro.

Diretór Jerál Turizmu MTKI, José Filipe Dias Quintas, informa ekipa tékniku husi MTKI no SEFOPE hala’o ona enkontru hodi aselera termu entrega atubele jere Bee Manas Marobo.

“Espera katak iha tempu badak ami sei simu termu entrega husi SEFOPE atu ami bele haree ona, nune’e bele prevee osan ba manutesaun tanba ita tenke iha sustetabilidade ba sitíu sira ne’e”, tenik José Filipe iha Portu Dili, tersa ne’e.

Nia adianta, tanba sítiu turístiku sira ne’e SEFOPE mak uluk dezenvolve, entaun presiza termu entrega ho baze ba Lei Orgánika Governu atu MTKI bele dezenvolve no halo jestaun di’ak liután.

Ho nune’e, nia akresenta liuhosi enkontru ekipa tékniku katak SEFOPE mós presiza hala’o termu entrega ba sítiu sira seluk hanesan Seloi-Kraik iha Aileu no sítiu Lekiraka (Reki- Raka) iha Viqueque, One Dolar Beach iha Metinaro no iha Com, Munisípiu Lautém.

“Ami mós hein sira (SEFOPE) atu oinsá fó fila sítiu sira ne’e ba Ministériu Turizmu, Komérsiu no Indústria, nune’e ami hadi’a hikas fali no mós haree ba ninia jestaun”, nia realsa.

Tanba ne’e, Diretór ne’e salienta sítiu ne’e dezenvolve ona maibé laiha jestaun di’ak mak halo fatin sira ne’e sei abandona.

“Ita presiza jere no investe ona atu ema komesa tama ita nia fatin no haree ba retribuisaun fali bainhira haree infraestrutura bázika sira komesa di’ak ona. Bainhira ema ba haris ka vizita de’it fatin sira ne’e tenke selu atu hatama reseita no bele hadi’a infraestrutura sira”, nia informa tan.

Antes ne’e, Xefe Suku llat-Laun, Postu Administrativu Bobonaro, Munisípiu Bobonaro, Juvenal Pires Amaral, hateten autoridade komunitária ho joven sira harii ona ekipa jestaun ba Bee Manas Marobo, maibé daudaun la funsiona tanba seidauk iha legalidade husi Prezidente Autoridade.

“Ami uluk (2017 to’o 2018) hahú fó ona tarefa atu motór ida tama selu $1 no karreta $5, maibé agora paradu tanba ami laiha baze legál. Ami halo regulamentu operasionál ba munisípiu atu aprova, maibé to’o agora seidauk iha resposta”, haktuir líder komunitáriu ne’e.

Nune’e, nia dehan antes ne’e xefe suku tolu iha Marobo ne’e tuur hamutuk ona hodi halo regulamentu operasionál no entrega ba Prezidente Autoridade Bobonaro, maibé to’o agora seidauk aprova.

Nia subliña, hahú husi 2017 to’o 2018, kuandu loron boot hanesan Natál no tinan foun inklui finadu bele rekolla reseita $700 to’o $900, maibé loron bain-leet dala ruma fulan-ida menus husi 100.

Parte seluk, Komunidade llat-Laun, Maria da Cruz, dehan daudaun ne’e Bee Manas Marobo laiha ema ida mak hein no vizitante tama ho gratuita.

“Ita haree abandona de’it. Ami sira ne’e mak haree ema mai vizita entaun ami mai fa’an sasán ka hahán”, nia akresenta.

Bee Manas Marobo konstrui no reabilita hosi SEFOPE iha 2015 ho valór orsamentu $498.860 no inaugura iha 08 dezembru 2016 husi Ministru Planeamentu no Investimentu Estratéjiku, Kay Rala Xanana Gusmão no Sekretáriu Estadu Polítika Formasaun Profisionál Empregu, Ilídio Ximenes da Costa, iha VI Governu Konstitusionál nia tempu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here