Logo Ministériu Saúde.

DILI, 18 fevereiru 2020 (TATOLI)-Diretór Servisu Saúde Munisípiu Aileu, Julio dos Santos, hateten durante tinan 2019 liubá nia parte implementa ona Programa Servisu Integradu Saúde Komunitária (SISCA) ba komunidade ho di’ak.

Durante tinan kotuk, Servisu Saúde Munisípiu Aileu konsege implementa programa SISCA iha fatin hamutuk 33 no postu SISCA hamutuk 20.

Notísia Relevante :Problema Finanseira Afeita ba Implementasaun Programa SISCA

“Banhira ita atu implementa ita haree liuba rekursu umanu dalaruma la to’o maibé ita jere rasik rekursu umanu ne’ebé mak iha Munisípiu rasik,”katak Diretór Julio dos Santos durante sorumutu avaliasaun ne’ebé hala’o hosi Ministériu Saúde ho Diretór Servisu Saúde Munisípiu Sira iha Salaun ICS Comoro, ohin.

Nia dehan tan, komunidade ninia partisipasaun iha programa SISCA ne’e importante.”Oinsá ita atu promove ka mobiliza komunidade sira hotu para bele komprende entaun informa ba sira atu nune’e bele partsipa másimu iha programa SISCA ne’e rasik,”Diretór ne’e realsa.

Problema estrada aat maka sai fatór ne’ebé difikulta pesoál saúde sira hodi fó tratamentu saúde to’o ba komunidade sira iha área rural.

“Kondisaun sira ne’e la sai impaktu ba pesoál saúde sira para hamate sira-nia vontade atu servisu ne’e lae maibé ami jere nafatin para dalaruma balun la bá ho transporte maibé ami organiza para pesoál saúde sira la’o ain para to’o iha komunidade sira-nia le’et hodi fó tratamentu,”nia hateten.

Entretantu, moras infeksaun vias respiratóri, diarea no moras kulit maka rejista a’as durante fulan-janeiru,2020 iha Aileu.

Tuir Nia, Servisu Saúde iha Munisípiu Aileu iha estoke Aimoruk sufisiente hodi fó tratamentu saúde ba pasiente sira.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here