Prezidente Autoridade RAEOA-ZEESM TL, José Luís Guterres ‘Lugu’. Imajen Tatoli/Egas Cristovão

DILI, 18 fevereiru 2020 (TATOLI)Prezidente Autoridade Rejiaun Administrativa Espesiál Oé-Cusse (RAEOA) no Zona Ekonomia Espesiál Sosiál Merkadu (ZEESM), José Luís Guterres ‘Lugu’, konfirma nia parte sei simu lista naran ba kargu sekretária rejionál sira.

Ba kestaun ne’e, Lugu prefere pozisaun ba kargu ne’e maioria tenki Oé-Cusse oan.

“Aban ami simu ona lista naran ba sekretária rejionál sira, ne’ebé tempu badak ha’u sei mai aprezenta ba Primeiru-Ministru. Ami hanoin ona katak presiza fó pozisaun sira ne’e maioria ba Povu Oé-Cusse feto no mane hotu, tanba sira mak tenke partisipa”, dehan Lugu iha Palásiu Governu, tersa ne’e.

Notísia Relevante: PM Taur Preokupa Seidauk iha Nomeasaun ba Sekretáriu Rejionál RAEOA

Prezidente Autoridade defende kargu ne’e ba Oé-Cusse oan tanba konsidera sira iha kapasidade naton hodi okupa kargu ne’e.

“Rai Oé-Cusse ninia ema kompetente barak. Ami kompriende hanesan ita ba Viqueque, Suai no Ermera karik normalmente ita-nia ema husu katak fó netik funsaun ruma ba ami rai-na’in tanba ami mós hakarak fó kontribuisaun. Tanba ne’e, presiza ko’alia ba malu, respeita malu, no trespeita tradisaun. Ha’u fiar katak ho buat sira ne’e hotu ita bele iha pás no estabilidade sosiál”, nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here