José Luís Guterres ‘Lugu’. Imajen Tatoli/Egas Cristovão

DILI, 18 fevereiru 2020 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Ekonomia Espesiál Sosiál Merkadu (ZEESM), José Luís Guterres ‘Lugu’, rekoñese presiza baze legál ida hodi resolve Ró Haksolok ne’ebé daudaun sai polémika iha públiku nia leet.

“RAEOA no Governu Sentrál presiza halo reuniaun ida atu haree dalan ne’ebé mak di’ak tuir lei hodi ita bele rezolve kestaun Ró Haksolok. Tanba ne’e, aban ekipa legál sira sei tuur hamutuk atu haree saida maka bele halo atu ita bele proteje investimentu ne’ebé Estadu Timor-Leste halo tiha ona ba ró ne’e”, tenik Lugu hafoin hasoru malu ho Primeiru-Ministru, Taur Matan Ruak iha Palásiu Governu, tersa ne’e.

Notísia Relevante: Alkatiri: Ró Haksolok Tenke iha Desizaun

Nia refere liután, kestaun orsamentu sai problema atu resolve Ró Haksolok maibé dahuluk mak sei haree baze legál.

“Kestaun orsamentál ne’e problema ida, tanba ita laiha orsamentu maibé kona-ba asuntu legál ita presiza halo tanba ita iha ona asesor legál sira ne’ebé bele fó opiniaun ba ita kona-ba saida mak atu halo ba oin. Ita presiza baze legál atu bele defende didi’ak interese Estadu Timor-Leste”, nia afirma.

Tuir nia, asuntu legál sira ne’ebé parte rua tuur hamutuk maka kona-ba definisaun Ró Haksolok ne’e hosi ne’ebé, entre Governu Sentrál nian ka Autoridade RAEOA, nune’e husi parte hotu labele iha lakuna.

Nune’e, atu rezolve Ró Haksolok, Prezidente Autoridade husu parte hotu atu bele tuur hamutuk bazeia ba baze legál, ekonómika no rendimentu ba Estadu Timor-Leste hodi bele iha opsaun seluk.

“Aban ami nia asesor legál hosi RAEOA no Gabinete Primeiru-Ministru nian sei tau hanoin hamutuk hodi halo rekomendasaun ida”, nia akresenta.

Nia subliña, PM Taur deside ona asesor legál na’in-rua mak sei hasai rekomendasaun hodi bele avansa ba oin ho serteza kona-ba lagalidade.

Konstrusaun Ró Responsabiliza Husi Autoridade RAEOA

Prosesu kontrusaun Ró Haksolok ninia kontratu asina iha tinan-2014 entre Governu no empreza portugués.

Konstrusaun ró ne’e konsege paradu maibé bainhira estabelese ZEESM, prosesu kontrusaun ró-ahi ne’e entrega ba Autoridade RAEOA mak responsabiliza.

Entretantu, Ró Haksolok ho kustu millaun €13,7, inaugura iha loron 26 maiu 2017 iha sidade Figuerra da Voz, Portugál no tuir informasaun sei to’o Timor-Leste iha outubru 2017, maibé tanba problema internál husi kompañia Atlantic Eagle ship Building ho sub-kontratór maka to’o agora ró ne’e seidauk mai.

Ró ne’e rasik iha kapasidade atu tula ema na’in-377 no karreta hamutuk 15.

Desizaun hili ninia estaleiru (fatin atu harii ró)  hahú ho husi V Governu Konstitusionál ne’ebé lidera husi Kayrala Xanana Gusmão nu’udar Primeiru-Ministru, no ninia reprezentante, Ministru Transporte no Komunikasaun, Pedro Lay da Silva, ne’ebé selebra kontratu ho estaleiru Atlantic Eagle ship Building loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no alokasaun orsamentu husi Governu Timor-Leste ba Autoridade RAEOA-ZEESM hodi transfere podér no alokasaun verba ne’ebé akontese liu tiha akordu entre Governu no Estaleiru Atlantic Eagle ship Building.

Atu garante implementasaun tuir espesifikasaun no padraun tékniku ba Ferry Ró Haksolok no assegura katak ró ne’e bele hetan rejistu internasionál (registo internacional de navios da Madeira em Portugal), tuir rekezitu Governu Timor-Leste, tenki liuhosi RAEOA-ZEESM mak tenki selebra kontratu supervizaun ba konstrusaun ferry ho instituto soldadura e Qualidade (ISQ), ne’ebé hanesan instituisaun ho esperiénsia liu tinan 50 iha área konstrusaun ró ne’ebé kredénsiál atu fiskaliza konstrusaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here