Prezidente Autoridade RAEOA-ZEESM,TL sesante, José Luís Guterres ‘Lugu’. Imajen Tatoli/Egas Cristovão

DILI, 18 fevereiru 2020 (TATOLI)–Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Ekonomia Espesiál Sosiál Merkadu (ZEESM), José Luís Guterres ‘Lugu’, otimista sei dezenvolve di’ak liután rejiaun ne’e durante ninia mandatu.

Tanba ne’e, nia parte hala’o ona vizita serbisu ba suku sira iha RAEOA hodi rona direta preokupasaun komunidade.

“Ha’u bá Oé-Cusse dala barak ona, maibé foin lalais ha’u bá fali hodi vizita suku ida-ne’ebé maka dook tebes hanesan Suku Malelat, kompara karik hanesan suku ida iha Lolotoe, Munisípiu Bobonaro. Suku Malelat ninia ema di’ak tebes no sira la husu buat barak, maibé sira hakarak de’it maka hadi’a estrada, bee-moos, no postu saúde”, informa Lugu hafoin hasoru-malu ho Xefe Governu iha Palásiu Governu, tersa ne’e.

Nia dehan, meski daudaun ne’e nia serbisu hela iha Dili maibé bainhira iha kestaun ne’ebé liga ho Oé-Cusse, nia parte sei halo esforsu atu buka solusaun di’ak ba rejiaun ne’e.

Lugu refere, kona-ba saláriu funsionáriu sira kada fulan la’o ho di’ak, nune’e mós projetu sira iha RAEOA kontinua la’o.

“Ami agora esforsu atu kompleta fasilidade iha Aeroportu Internasionál Rota do Sândalo, tanba ne’e maka iha loron 20 fevereiru agora, ha’u sei reuniaun ho empreza ne’ebé kaer obra ne’e hodi kompleta buat ne’ebé seidauk kompletu. Esforsu administrasaun ami halo daudaun, ita mesak timoroan de’it tanba ne’e serbisu ne’ebé hala’o iha fatin ida tenke fó ita-nia matenek, hanoin no kbiit atu povu Oé-Cusse bele moris di’ak liután”, nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here