Xefe Suku Lore II, Armando de Jesus. Imajen/Natalino Costa

LAUTÉM, 18 fevereiru 2020 (TATOLI) – Xefe Suku Lore II, Postu Administrativu Lospalos, Munisípiu Lautém, Armando de Jesus, hateten suku ne’e potensiál iha agrikultura maibé komunidade sira kontinua preokupa ho estrada ne’ebé aat, liuliu iha tempu udan tanba difikulta sira atu lori produtu ba merkadu.

“Ami nia produtu potensiál maka ai-farina no kamii, maibé produtu sira labele lori ba merkadu atu fa’an tanba estrada ladi’ak, sá tán tempu udan difikulta tebes ami atu lori ba merkadu”, tenik líder komunitáriu ne’e ba Agência TATOLI, iha Suku Lore II, tersa ne’e.

Nia dehan, estrada la’ós sai preokupasaun ba komunidade Suku Lore II de’it, maibé mós Suku Lore I.

“Ami Suku Lore I no II, desde uluk sempre preokupa maka estrada, tanba desde uluk ami nia estrada Kontinua aat”, nia akresenta.

Armando de Jesus refere liután kona-ba eletrisidade no bee moos, komunidade suku rua ne’e asesu ona.

“Ami nia eletrisidade iha ne’e komunidade asesu hotu ona no bee moos laiha problema, maibé preokupasaun ba ami maka estrada tanba to’o agora Fovernu  seidauk rezolve”, nia salienta.

Xefe Suku ne’e haktuir, iha tinan-2014 Organizasaun Naun Govermentál (ONG) internasionál balun haree ona atu hadi’a estrada, maibé to’o agora la konsege realiza no lakon kontaktu ho líder komunitáriu sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here