Prezidente Konsellu Imprensa, Virgilio Guterres bainhira ko'alia iha seminar internasional, ohin iha Delta Nova. Foto Tatoli/Antonio Goncalves

DILI, 18 fevereiru 2020 (TATOLI)—Prezidente Konsellu Imprensa (KI), Virgílio da Silva Guterres informa, bazeia ba rezultadu verifikasaun KI nian durante ne’e ba Órgaun Komunikasaun Sosiál sira iha Timor-Leste, iha mídia balun mak la hala’o tuir prinsípiu jornalizmu nian liuhusi “Grande Entrevista” ho fonte espesiál “Xanana Gusmão”, foin lalais ne’e.

“Ha’u bele sita pergunta ne’ebé mak entrevistadór uza mak hanesan ‘Maun-boot, foin fila husi rai-li’ur, iha jornál balun públika katak Primeiru-Ministru (PM) mak lakohi Prezidente Repúblika (PR) atu fó pose?” Xanana hatán, ‘La’ós, Prezidente Repúblika lakohi fó pose’. Purtantu, narasaun ida-ne’e sai kestaun ba públiku tanba entrevistadór lakohi temi jornál ne’e loloos hodi sai ninia referénsia ba nia programa Grande Entrevista ho fonte anónimu,” dehan Virgílio Guterres liuhusi konferénsia imprensa iha salaun KI, Kintál Boot, Dili, ohin.

Bazeia ba referénsia ne’ebé KI konklui, nia esplika, katak entrevistadór hamosu narasaun ho pergunta ne’ebé la bazeia ba faktu. Tanba entrevistadór ida, tuir nia, livre foti referénsia husi ne’ebé de’it maibé fonte ne’e tenke klaru.

“Ami Konsellu Imprensa preokupa mak fonte la klaru. Presiza pergunta ne’ebé mak bazeia ba referénsia ne’ebé klaru,” nia dehan.

Tanba ne’e, nia haktuir, KI kontinua esforsu no husu ba mídia refere atu tau atensaun ba programa ne’ebé mak públiku hotu asesu no ho fonte espesiál ka figura importante hanesan Xanana Gusmão, Marí Alkatiri, Francisco Lú Olo, Ramos Horta no seluk tan.

Iha fatin hanesan, Konselleiru Konsellu Imprensa (KI), Francisco Simões hateten, jornalista sira tenke evita hodi foti referénsia hoax (notísia bosok) bainhira uza atu halo entrevista fonte.

Entretantu, relasiona ho preokupasaun públiku nian ba Grande Entrevista ne’e, Konselleiru KI Ba Asuntu Dezenvolvimentu Mídia, Hugo Fernandes esplika, jornalista sira mak serbí direitu públiku nian atu hetan informasaun loloos.

“Bainhira jornalista ida mak la admite informasaun loloos mak ita la hakonu ema-nia direitu atu hetan informasaun,” nia haklaken.

Notísia Relevante: Jornalista Labele Hatama Opiniaun iha Notísia

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here